Nashik News | मुलीच्या लग्नात आईला उपस्थित राहण्यास मनाई, नाशिकमधील धक्कादायक प्रकार

नाशिक : पतीच्या आत्महत्येनंतर दशक्रिया विधीला गैरहजर राहिल्याने गेली कित्येक वर्षे सामाजिक बहिष्कार सहन करत असलेल्या महिलेला मुलीच्या लग्नात हजर राहण्यासही सासरच्या मंडळींकडून मनाई केली गेली, अशी धक्कादायक माहिती समोर आली आहे. मुंगसरे येथील या प्रकाराबद्दल पीडित महिलेने अंधश्रद्धा निर्मूलन समितीच्या माध्यमातून विधान परिषदेच्या उपसभापती डॉ. नीलम गोऱ्हे यांच्याकडे तक्रार केली. या तक्रारीची तत्काळ दखल घेत डॉ. गोऱ्हे यांनी ग्रामीण पोलिस अधीक्षकांना कारवाईचे निर्देश दिले आहेत. त्यामुळे या महिलेस न्याय मिळण्याची शक्यता निर्माण झाली आहे. या महिलेला लग्नात हजर राहण्याची संधी मिळू शकणार आहे.

तालुक्यातील मुंगसरे सासर असलेल्या परंतु गिरणारे येथे वास्तव्यास असलेल्या सफाई कामगार महिला सुनीता (नाव बदलले आहे) यांच्या पतीने तीन वर्षांपूर्वी आत्महत्या केली होती. त्यास जबाबदार धरून सासरच्या मंडळींनी त्या महिलेला मारहाण केली होती. तिच्या नवर्‍याच्या अंत्यविधीलाही येऊ दिले नव्हते. ती महिला दशक्रिया विधीला उपस्थित न राहिल्याने तिच्यावर सामाजिक बहिष्कार टाकला होता. तो आजपर्यंत कायम आहे. महिलेकडून दोन मुली व मुलगा हिरावून घेतले गेले. सासरचे लोक त्यांना आईशी बोलू देत नाहीत. त्यांच्या मोठ्या मुलीचे लग्न दि. २१ फेब्रुवारीला दिंडोरी येथे आहे. त्या लग्नात त्यांना उपस्थित राहण्यास मनाई करण्यात आली आहे. पीडित महिलेला लग्नात उपस्थित राहण्याची इच्छा आहे. यासाठी तिने महाराष्ट्र अंधश्रद्धा निर्मूलन समितीशी संपर्क साधला होता. अंनिसने त्यांना सोबत घेऊन नाशिक तालुका पोलिस ठाण्यात तक्रार अर्ज दाखल केला. पीडितेच्या सासरच्या लोकांचे समुपदेशन करून तिला मुलीच्या लग्नात हजर राहता यावे, अशी मागणी पोलिसांकडे करण्यात आली. परंतु, पोलिसांनी न्यायालयात जाण्याचा सल्ला दिला. त्यामुळे याप्रकरणी अंनिस कार्यकर्त्यांनी पीडितेला घेऊन विधान परिषदेच्या उपसभापती डॉ. नीलम गोऱ्हे यांची भेट घेतली. त्यांनी ग्रामीण पोलिस अधीक्षक यांना यात लक्ष घालण्याच्या सूचना केल्या. त्यामुळे महिलेच्या नैसर्गिक न्यायाप्रमाणे स्वतःच्या मुलीच्या लग्नात उपस्थित राहून मुलीला आशीर्वाद देण्याची इच्छा पूर्ण होण्याची चिन्हे दिसत आहेत.

अंनिस कार्यकर्ते पीडित महिलेसह दिंडोरी पोलिस ठाण्यात तक्रार अर्ज दाखल करणार आहेत. पोलिस संरक्षणात लग्नात हजर राहण्यासाठी मागणी केली जाणार आहे. अंनिसने नाशिक तालुका पोलिस ठाण्यात दिलेल्या निवेदनावर डॉ. टी. आर. गोराणे, कृष्णा चांदगुडे, महेंद्र दातरंगे, कोमल वर्दे यांच्या स्वाक्षऱ्या आहेत.