پٹرول پمپ مالکان متحرک

سرینگر/بلال فرقانی/سڑک حادثات میں اضافے کے پیش نظرپٹرول پمپ مالکان نے کم عمر اور ہیلمٹ کے بغیر ڈرائیوروں کو ایندھن نہ دینے کا فیصلہ کیاہے۔ شہر میں قائم ایک پٹرول پمپ کے مالک نے میڈیا سے بات کرتے ہوئے کہا کہ یہ اقدام حفاظتی عمل اور کم عمر ڈرائیوروں کی طرف سے لاپرواہی کو روکنے کیلئے کیا گیا ہے۔انہوں نے کہا’’حالیہ ایام میں ہم نے کم عمر افراد کو گاڑیاں چلاتے دیکھا ہے اور وہ ہیلمٹ نہیں پہنے تھے، جس کی وجہ سے حادثات میں اضافہ ہوا ‘‘۔ انہوں نے مزید کہا کہ یہ اقدام اس عمل کو روکنے کیلئے اٹھایا گیا ہے تاکہ نوجوانوں کی زندگیوں کو مزید خطرے سے بچایا جا سکے‘‘۔یہ فیصلہ ٹینگہ پورہ المناک حادثہ کے پیش نظر لیا گیاہے جس میں2نوجوانوں کی جانیں گئیں۔اس حادثے کے بعد ٹریفک پولیس نے بھی ٹریفک قوانین کی سختی سے پابندی کرانے کیلئے اپنی کارروائیوں کو تیز کر دیا ہے۔ ایک سینئر ٹریفک پولیس افسر نے پٹرول پمپ کے فیصلے کی حمایت کرتے ہوئے کہا کہ اس طرح کے حفاظتی اقداماتحادثات پرقابو پانے میں معاون ثابت ہونگے۔ انہوں نے کہا’’یہ خوش آئند ہے کہ مقامی کاروباری بھی سڑکوں پر احتیاط میں اپنی ذمہ داری ادا کر رہے ہیں‘‘۔