अभिनेता विक्की कौशलने घेतले घृष्णेश्वराचे दर्शन:छावाच्या प्रमोशनसाठी छत्रपती संभाजीनगरच्या दौऱ्यावर

अभिनेता विक्की कौशल हा आज छत्रपती संभाजीनगरच्या दौऱ्यावर आहेत. त्यांनी या दौऱ्याची सुरुवात ही वेरुळमधील घृष्णेश्वराचे दर्शन घेत केली आहे. यानंतर ते आता शहरातील एका कार्यक्रमाला उपस्थित राहणार आहेत. दरम्यान 'छावा' हा चित्रपट 14 फेब्रुवारी रोजी प्रेक्षकांच्या भेटीला येत आहे. सध्या चित्रपटाचे जोरदार प्रमोशन सुरू आहे. या चित्रपटाच्या प्रमोशनासाठी ते एका चित्रपटगृहामध्ये जाणार आहेत. एका दृष्यावरून उठले होते वादंग दरम्यान, काही दिवसांपूर्वी छावा चित्रपटाचा ट्रेलर रीलीज झाल्यानंतर एका दृष्यावरून वाद निर्माण झाला होता. छत्रपती संभाजी महाराज एका दृष्यात गाण्यावर नाचताना दाखवले होते. यानंतर राज्यभरात वादंग उठले. अनेकांनी हा सीन काढण्याची मागणी केली होती. चित्रपटातील दृष्यावरून वाद उफळल्यानंतर लक्ष्मण उतेकर यांनी मनसे अध्यक्ष राज ठाकरेंची भेट घेतली होती. आम्ही चित्रपटातील सीन हटवणार असल्याची उतेकर यांनी सांगितले. महाराजांपेक्षा चित्रपटातील सीन मोठा नाही, असेही ते म्हणाले. शिवप्रेमींच्या भावना दुखावल्या असतील, तर आम्ही दिलगीरी व्यक्त करतो आणि तो सीन काढून टाकतो, असेही ते म्हणाले होते. चित्रपट 14 फेब्रुवारीला होणार प्रदर्शित छावा या चित्रपटात विकी कौशल छत्रपती संभाजी महाराजांची भूमिका साकारत आहे तर रश्मिका मंदाना महाराणी येसूबाई यांची भूमिका साकारत आहे. हा चित्रपट लेखक शिवाजी सावंत यांच्या छावा या कादंबरीवर आधारित आहे. या चित्रपटाचे दिग्दर्शन लक्ष्मण उतेकर यांनी केले आहे, तर मॅडॉक फिल्म्स आणि दिनेश विजन यांनी निर्मिती केली आहे. विकी आणि रश्मिका यांच्याशिवाय अक्षय खन्ना, दिव्या दत्ता, आशुतोष राणा, डायना पेंटी यांच्याही या चित्रपटात महत्त्वाच्या भूमिका आहेत. हा चित्रपट 14 फेब्रुवारीला प्रदर्शित होणार आहे.