आदित्य ठाकरे यांचे निकटवर्तीय सूरज चव्हाण यांना जामीन:खिचडी घोटाळ्याचे आरोप; जानेवारी 2024 पासून होते अटकेत

शिवसेना उद्धव ठाकरे गटाचे आमदार आदित्य ठाकरे यांचे निकटवर्तीय म्हणून ओळखले जाणारे सूरज चव्हाण यांना मुंबई उच्च न्यायालयाकडून मोठा दिलासा मिळाला आहे. सुरज चव्हाण यांच्यावर मुंबईतील खिचडी घोटाळ्यावरुन आरोप झाले होते. त्यानंतर त्यांना अटक करण्यात आली होती. मात्र आता त्यांना एक लाख रुपयांच्या रोख जातमुचलक्यावर जामीन मंजूर करण्यात आला आहे. सुरेश चव्हाण हे 17 जानेवारी 2024 पासून अटकेत आहेत. लॉकडाऊनच्या काळात झालेल्या खिचडी घोटाळ्याचे आरोप भाजप नेते किरीट सोमय्या यांनी केले होते. त्यानंतर सुरज चव्हाण यांना अटक करण्यात आली होती. कोविड काळात स्थलांतरितांना देण्यात आलेल्या खिचडी वाटपात घोटाळा झाल्याच्या आरोप प्रकरणी अटकेत असलेले व शिवसेना नेते आदित्य ठाकरे यांचे निकटवर्तीय मानले जाणाऱ्या सूरज चव्हाण यांची जवळपास 90 लाख रुपयांची मालमत्ता ईडीकडून जप्त करण्यात आली आहे. यात मुंबईतील फ्लॅट व रत्नागिरी जिल्ह्यातील भूखंडाचा देखील समावेश आहे. सूरज चव्हाण हे आदित्य ठाकरेंच्या अगदी जवळचे नेते म्हणून ओळखले जातात. त्यामुळे उद्धव ठाकरे आणि आदित्य ठाकरे अडचणीत येणार का? अशी कुजबुज सुरू झाली होती. मात्र, आता सूरच चव्हाण यांना जामीन मंजूर झाला आहे. काय आहे प्रकरण? मुंबई महापालिकेने लाईफ लाईन हॉस्पिटल मॅनेजमेंट या कंपनीला कोरोना काळात कोविड सेंटरचे कंत्राट दिले होते. या कंपनीला या आधीचा कोणताही अनुभव नसताना आणि त्यांच्याकडे पुरेसे मनुष्यबळही नसताना हे कंत्राट देण्यात आल्याचा आरोप करण्यात आला आहे. या कंपनीने बनावट कागदपत्रे दाखवून हे कंत्राट मिळवले होते. त्यात करोडो रुपयांचा घोटाळा झाल्याचा आरोप या कंपनीवर करण्यात आला आहे. त्यामध्ये संजय राऊतांचे निकटवर्तीय सुजित पाटकर आणि आदित्य ठाकरे यांचे निकटवर्तीय सूरज यांचा सहभाग असल्याचा आरोप आहे. कोण आहेत सूरज चव्हाण? खिचडी घोटाळ्याप्रकरणामध्ये मुंबई पोलिसांनी सूरज चव्हाण यांची चौकशी केली होती. या पाठोपाठ ईडीने त्यांना चौकशीचे समन्स बजावले. ईडीने त्यांना अनेक तास आपल्या कार्यालयात बसवून ठेवले. त्यांचा जबाब नोंदवला होता. तसेच, त्यांच्या चेंबूर येथील घरीही ईडीने धाड टाकली होती. युवा सेनेचा साधारण कार्यकर्ता ते ठाकरे गटाचा सचिव असा सूरज चव्हाण यांचा प्रवास आहे. सूरज चव्हाण यांनी वरळी येथील शिवसेना शाखेपासून कामाला सुरवात केली. त्यांच्या कामाचा झपाटा पाहून त्यांना शाखाप्रमुख करण्यात आले होते. 2010 साली शिवसेनाप्रमुख बाळासाहेब ठाकरे यांनी दसरा मेळाव्यात युवासेनाप्रमुख म्हणून आदित्य ठाकरे यांच्या नावाची घोषण केली. आदित्य ठाकरे यांच्या या युवा सेनेमध्ये अनेक नव्या तरुण चेहऱ्यांना संधी देण्यात आली. सुरज चव्हाण यांनी स्वतःला युवा सेनेच्या कामात झोकून घेतले. लवकरच आदित्य ठाकरे यांच्या अत्यंत जवळच्या व्यक्तींमध्ये सूरज चव्हाण यांनी स्थान मिळवले.