सुनेत्रा पवारांवर मोठी जबाबदारी:पहिल्याच टर्ममध्ये राज्यसभेच्या तालिका अध्यक्षपदी​​​​​​​ निवड, काहीच दिवसांपूर्वी मिळाला होता मोठा बंगला

राष्ट्रवादी काँग्रेसचे खासदार सुनेत्रा अजित पवार यांची राज्यसभेच्या तालिकाअध्यक्षपदी निवड करण्यात आली आहे. पहिल्याच टर्ममध्ये त्यांच्यावर ही मोठी जबाबदारी देण्यात आली आहे. त्यांच्यासह 8 खासदारांची तालिका अध्यक्षपदी निवड करण्यात आली आहे. दरम्यान राष्ट्रवादी काँग्रेस पक्षाचे कार्यकारी अध्यक्ष प्रफुल्ल पटेल यांनी सुनेत्रा पवार यांचे अभिनंदन केले आहे. ते म्हणाले, राज्यसभेच्या तालिका अध्यक्षपदी निवड झाल्याबद्दल त्यांचे मनःपूर्वक अभिनंदन व यशस्वी कार्यकाळासाठी अनेक शुभेच्छा! या आठ खासदारांची नियुक्ती राष्ट्रवादी काँग्रेस खासदार सुनेत्रा पवार यांच्यासह, तृणमूल काँग्रेसच्या खासदार सुश्मिता देव, भाजप खासदार किरण चौधरी आणि संगीता यादव या चार महिला खासदार तसेच भाजप खासदार घनश्याम तिवारी, डॉ. दिनेश शर्मा, द्रमुकचे पी. विल्सन आणि आम आदमी पक्षाचे विक्रमजितसिंग साहनी या खासदारांची तालिकाध्यक्षपदी निवड करण्यात आली आहे. तटकरेंनीही दिल्या शुभेच्छा राष्ट्रवादी काँग्रेसचे प्रदेशाध्यक्ष खासदार सुनील तटकरे यांनी X वर पोस्ट करत म्हटलंय की, राज्यसभेतील चर्चेला योग्य दिशा देणे, संसदीय कामकाजाची शिस्त कायम राखणे आणि सभागृहाचे कामकाज सुरळीत पार पाडणे यासाठी महत्त्वपूर्ण भूमिका असलेल्या ‘तालिका अध्यक्ष’ पदासाठी राष्ट्रवादी काँग्रेस पक्षाच्या राज्यसभा खासदार श्रीमती सुनेत्रा पवार यांची निवड झाल्याबद्दल त्यांचे मनःपूर्वक अभिनंदन व नवीन जबाबदारीसाठी शुभेच्छा! एनडीएत राष्ट्रवादीला मंत्रिपद नाही भाजपचे सहकारी अजित पवार यांच्या नेतृत्वाखालील राष्ट्रवादी काँग्रेस पक्षाला सध्या केंद्रातील NDA सरकारमध्ये कोणतेही मंत्रिपद मिळालेले नाही. नरेंद्र मोदी यांच्यासोबत 71 खासदारांनी मंत्रीपदाची शपथ घेतली होती. सुरुवातीला प्रफुल्ल पटेल यांचा नव्या एनडीए सरकारमध्ये स्वतंत्र प्रभार असलेले राज्यमंत्री म्हणून समावेश करण्याचा भाजपचा प्रस्ताव राष्ट्रवादी काँग्रेसने फेटाळला होता. पण मंत्रिपद नाही तर सुनेत्रा पवारांच्या रुपाने तालिका अध्यक्षपद देत राष्ट्रवादीला केंद्रीय राजकारणात मोठी जबाबदारी देण्यात आली आहे. सुनेत्रा पवारांना मोठा बंगला राष्ट्रवादी काँग्रेसच्या खासदार तथा अजित पवारांच्या पत्नी सुनेत्रा पवार यांना दिल्लीत मोठा बंगला मिळाला आहे. सामान्यतः पहिल्यांदा खासदार होणाऱ्या व्यक्तीला असा मोठा बंगला मिळत नाही. पण महाराष्ट्र विधानसभा निवडणुकीतील राष्ट्रवादीच्या यशामुळे सुनेत्रांना हा बंगला देण्यात आल्याची चर्चा राजकीय वर्तुळात रंगली. सुनेत्रा पवार यांना दिल्लीच्या लुटियन्सच्या 11 जनपथवरील टाईप -7 बंगला देण्यात आला आहे. खास गोष्ट म्हणजे हा बंगला राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्या 6 जनपथ स्थित टाईप -8 बंगल्याला अगदी चिकटून आहे. उल्लेखनीय बाब म्हणजे सुनेत्रा पवार यांचा लोकसभा निवडणुकीत खासदार सुप्रिया सुळे यांच्याकडून पराभव पत्करावा लागला होता. त्यानंतर राष्ट्रवादीने त्यांना राज्यसभेवर पाठवले होते. हा घटनानंतर लोकसभा निवडणुकीनंतर काही दिवसांतच घडला होता. अजित पवारांची दिल्लीत ताकद वाढली लोकसभा निवडणुकीत राष्ट्रवादी काँग्रेसला केवळ 1 जागा मिळाली होती. पण त्यानंतर झालेल्या विधानसभा निवडणुकीत राष्ट्रवादीला तब्बल 41 जागा मिळाल्या. याऊलट शरद पवारांच्या राष्ट्रवादीला अवघ्या 10 जागांवर समाधान मानावे लागले. या कामगिरीमुळे अजित पवारांची दिल्लीतील ताकद वाढली आहे. यामुळेच सुनेत्रा पवार यांना दिल्लीत मोठा बंगल्याचे वाटप करण्यात आल्याची चर्चा आहे.