उत्कृष्ट कामगिरीबद्दल चांदूर रेल्वे येथील पोलिसांचा एसपींकडून सत्कार:विधानसभा निवडणुकीच्या धामधुमीतही विविध गुन्ह्यांचा लावला छडा

निवडणुकीच्या कामकाजाचा ताण असतानाही तपासात उत्कृष्ट कामगिरी बजावल्याबद्दल स्थानिक पोलिसांचा जिल्हा पोलिस अधीक्षकांकडून सत्कार केला. विधानसभा निवडणूक सुरु आहे. त्यामुळे पोलिसांवर कामाचा ताण वाढला आहे. परंतु असे असतानाही तालुक्यातील गुन्ह्यातील व चोरीतील आरोपींना ठाणेदार अजय आकरे यांच्या मार्गदर्शनात, पीएसआय सुयोग महापुरे, हेड कॉन्स्टेबल शिवाजी घुगे, प्रवीण मेश्राम व इतर अंमलदार यांनी कारवाई करत आरोपींना अटक केली. त्यांच्या जवळून चोरी गेलेल्या मुद्देमाल जप्त केला. पोलिसांनी केलेल्या याच कामाची पावती पोलिस अधीक्षक विशाल आनंद यांनी दिली आहे. गेल्या काही दिवसात तालुक्यातील ग्रामीण भागात चोरीची विविध प्रकरणे घडली आहेत. पण स्थानिक पोलिसांनी या प्रकरणांची दखल घेतली व तालुक्यातील मालखेड या गावातील अंबादेवी मंदिर बांधकामावरुन चोरी गेलेल्या लोखंडी सलाखी शोधून काढल्या. लालखेड येथील घरफोडीचा गुन्हा उघड करून आरोपी कडून मुद्देमालासह १२ हजार रुपये जप्त केले. एरंडगाव येथील शेतकरी तिडके यांच्या शेतातील सोयाबीन चोरीचा गुन्हा उघड करून आरोपीच्या ताब्यातून पंधरा कट्टे सोयाबीन किंमत २७ हजार रुपये, तर याच गावातील एका शेतकऱ्याची चोरी गेलेली पानडूब्ब्बी मोटर व इतर चोरी गेलेले काही सामान जप्त करुन त्यांना दिलासा दिला.