कर्तव्यनिष्ठेचे उदाहरण:नवनियुक्त आयुक्त श्वेता सिंघल यांनी पदभार स्वीकारताच मंत्र्यांच्या बैठकीत केला सहभाग

अमरावतीच्या नवनियुक्त विभागीय आयुक्त श्वेता सिंघल यांनी आज गुरुवारी त्यांच्या कार्यकाळाची सुरुवात कर्तव्यनिष्ठेने केली. त्यांनी सकाळी पदभार स्वीकारल्यानंतर लगेचच ग्रामविकास मंत्री जयकुमार गोरे यांच्या महत्त्वपूर्ण बैठकीत सहभाग नोंदवला. २००९ च्या बॅचच्या या आयएएस अधिकारी यापूर्वी राजभवनाच्या सचिव होत्या. दोन दिवसांपूर्वीच त्यांची विभागीय आयुक्त म्हणून नियुक्ती करण्यात आली होती. सकाळी विश्राम भवनात प्रभारी आयुक्त तथा जिल्हाधिकारी सौरभ कटियार यांच्याकडून त्यांनी पदभार स्वीकारला. श्वेता सिंघल यांचा महाराष्ट्रातील प्रशासकीय अनुभव दांडगा आहे. त्यांनी साताऱ्याच्या जिल्हाधिकारी म्हणून यशस्वी कारकीर्द गाजवली असून, त्यांच्या प्रशासकीय कारकिर्दीची सुरुवात परीविक्षाधीन अधिकारी म्हणून अकोला येथून झाली होती. विभागीय आयुक्तालयात पदभार स्वीकारण्याच्या कार्यक्रमास उपायुक्त गजेंद्र बावणे, डॉ. पंजाबराव देशमुख विदर्भ प्रशासकीय प्रबोधिनीचे प्रमुख अजय लहाने, सहायक आयुक्त तुकाराम टेकाळे, स्वीय सहायक अतुल लवणकर यांच्यासह अन्य विभाग प्रमुख उपस्थित होते. उल्लेखनीय बाब म्हणजे, यापूर्वीच्या आयुक्त डॉ. निधी पांडेय या गेल्या आठवड्यापासून दीर्घ रजेवर असल्याने, त्यांचा कार्यभार जिल्हाधिकारी सौरभ कटियार यांच्याकडे होता.