काॅपीमाफियांमुळे आमचा संतोष देशमुख होईल, सशस्त्र सुरक्षा द्या:दहावी, बारावीच्या परीक्षेसाठी आयोजित बैठकीत शिक्षकांची मागणी

इतर माफियांप्रमाणेच काही ठिकाणी कॉपीमाफियाही असतात. त्यामुळे दहावी-बारावी परीक्षा काळात परीक्षकांच्या जिवाला धोका निर्माण होऊ शकतो. ४-५ गावांतील लोकांनी हल्ला केला तर आमचाही ‘संतोष देशमुख’ होणार नाही याची हमी द्याल का? यासाठी एक महिना हत्यारबंद सुरक्षा पुरवणार का?’ असा सवाल शिक्षकांनी गुरुवारी विभागीय शिक्षण मंडळातील बैठकीत अधिकाऱ्यांना केला. दहावी-बारावीच्या परीक्षा कॉपीमुक्त होण्यासाठी सरस्वती भुवन महाविद्यालयात शिक्षण मंडळातर्फे बैठकीचे आयोजन केले होते. विभागीय सचिव डॉ. वैशाली जामदार, सहसचिव प्रियाराणी पाटील, सहायक सचिव डी. एम. पानसरे यांची हजेरी होती. या सभेत एक शिक्षक म्हणाले, ‘अनेक जिल्ह्यांत कॉपीमाफियांची दहशत असते. त्यामुळे आम्हाला सुरक्षा पुरवा.’ हे एेकून सारेच स्तब्ध झाले. दरम्यान, दुसऱ्या बैठकीत जि.प. सीईओ विकास मीणा यांनी सांगितले की, शाळा कोणत्याही नेत्याची असो, कॉपी, गैरप्रकार करणाऱ्यांची गय करणार नाही.’ ‘परीक्षा पे चर्चा’ नव्या शैलीत, मोदींसह १२ मान्यवरांचे विद्यार्थ्यांना मार्गदर्शन दरवर्षी परीक्षेच्या काळात पंतप्रधान नरेंद्र मोदी हे देशभरातील विद्यार्थ्यांशी संवाद साधत असतात. यंदा हा ‘परीक्षा पे चर्चा’ कार्यक्रम १० फेब्रुवारीला दिल्लीच्या भारत मंडपम येथे आयोजित करण्यात आला आहे. हा कार्यक्रम पारंपरिक टाऊन हॉल पद्धतीने घेण्याऐवजी यंदा त्यात अभिनेत्री दीपिका पदुकोण, बॉक्सर मेरी काेम, आध्यात्मिक गुरू, सद्गुरू यासारख्या मान्यवरांना निमंत्रित कुरून त्यास वेगळे रूप देण्यात आले आहे. पंतप्रधान मोदींच्या चर्चेचा पहिला भाग सकाळी ११ वाजता प्रसारित होईल. त्यात मोदींनी ३५ विद्यार्थ्यांशी तणाव व्यवस्थापन या विषयावर नवी दिल्लीतील सुंदर नर्सरीत चर्चा केली आहे. उर्वरित ७ भागांत वरील सेलिब्रिटींसह विविध मान्यवर विद्यार्थ्यांशी चर्चा करतील आणि चिंता करणारे (worriers) ते योद्धा (warriors) बनण्यासंबंधी मार्गदर्शन करतील. दीपिका ते विक्रांत मॅस्सीपर्यंत खेळ-शिस्त: एमसी मेरी काेम, अवनी लेखरा व सुहास यतिराज. मानसिक आरोग्य : दीपिका पदुकोण पोषण : सोनाली सभरवाल, रुजुता दिवेकर, फूड फार्मर रेवंत हिमात्सिंगका तंत्रज्ञान व अर्थ : गौरव चौधरी (टेक गुरू), राधिका गुप्ता रचनात्मक व सकारात्मकता: विक्रांत मॅस्सी, भूमी पेडणेकर. जागृत व मानसिक शांती: सद्गुरू जग्गी वासुदेव. विविध परीक्षांतील अव्वल विद्यार्थी आपल्या यशकथा सांगतील.