भंडारा जिल्हा परिषद विषय समित्यांची आज निवडणूक:भाजप आणि काँग्रेसची अडकित्यात सापडलेल्या सुपारीसारखी अवस्था

काँग्रेस जिल्हा परिषदेतील सर्वात मोठा पक्ष असला तरी, भाजप, राकाँ व शिवसेनेसोबत अपक्ष व इतर पक्षांची मोट बांधल्याने उपाध्यक्ष पदाच्या निवडणुकीत काँग्रेसला पराभव झाला. आता आज शुक्रवारी होत असलेल्या विषय समित्यांच्या निवडणुकीसाठी समिकरणे ठरविली जात असताना राकाँचे पाच काँग्रेससोबत दौऱ्यावर गेले. यामुळे सभापती पदांवर महायुती की महाविकास आघाडी? असा प्रश्न पुन्हा निर्माण झाला असला तरी अडकित्यात सापडलेल्या सुपारीसारखी भाजप व काँग्रेसची अवस्था झाली आहे. भंडारा जिल्हा परिषदेत एकूण ५२ सदस्य संख्या आहे. त्यापैकी काँग्रेसचे २१ सदस्य आहेत. याशिवाय भाजप १२, राष्ट्रवादी काँग्रेस १३, अपक्ष ३ आणि बपस, वंचित आघाडी आणि शिवसेनेचे प्रत्येकी एक एक सदस्य निवडून आले होते. मध्यंतरी भाजपच्या माहेश्वरी नेवारे यांचे सदस्यत्व रद्द झाल्यामुळे भाजपची सदस्य संख्या ११ झाली आहे. अडीच वर्षांनंतर अध्यक्ष पदाच्या निवडीदरम्यान अनुसूचित जमातीची महिला सदस्य महायुतीकडे नसल्यामुळे काँग्रेसच्या कविता उईके यांची बिनविरोध निवड झाली. मात्र, उपाध्यक्ष पद मिळवण्याकरिता राकाँचे एकनाथ फेंडर यांनी धडपड केली. त्यात त्यांनी आपल्या पाच ते सात सदस्यांसोबत भाजपसोबत जाऊन बहुमताचा आकडा गाढला व उपाध्यक्ष पद आपल्या पदरात पाडून घेतले. या घडामोडीमुळे सर्वात मोठा पक्ष असलेल्या काँग्रेसला हात चोळत बसून राहावे लागले होते. यामुळे चोरावर मोर ठरण्याकरिता काँग्रेसच्या हालचाली वाढल्या. यात पदाचा व अर्थार्जनाच मोह आवरू न शकल्याने राकाँचे पाच सदस्य काँग्रेससोबत परराज्यात सहलीला गेल्याचे वृत्त आहे. जर हे पाच सदस्य काँग्रेसकडे गेले तर, काँग्रेसच्या बाजूला भाजप महायुतीपेक्षा एक सदस्य अधिक होऊन बहुमताचा गेम होऊ शकतो. दुसरीकडे महायुतीचे गट नेते अविनाश ब्राह्मणकर यांनी शुक्रवारी होत असलेल्या निवडणुकीकरिता व्हीप जारी केला आहे. आज समाजकल्याण समिती, महिला व बालकल्याण समितीसह इतर दोन विभागांचे असे चार सभापतींची निवड होणार आहे. मात्र, सत्ता मिळवण्याकरिता सतत इकडून तिकडे ये-जा करणाऱ्या सदस्यांमुळे काँग्रेस व भाजप सारखे मोठे पक्ष कात्रीत सापडले आहेत. या निवडणुकीबद्दल विचारणा केली असता आज काय होते, ते पाहू अशी भूमिका नेत्यांना घ्यावी लागत आहे. त्यामुळे आज होणारी निवडणूक भंडारा जिल्हा परिषद आता कोणाच्या ताब्यात आहे? हे सिद्ध करणारी ठरू शकते. मोठे नेते सर्वकाही स्थानिक पदाधिकारी सांभाळत असल्याचे सांगत असले तरी, प्रत्येक पक्ष आपले रेप्यूटेशन सांभाळले जावे याच्या तयारीत आहे. कुणाच बिघडणार अन् कुणाच ठरणार विशेष म्हणजे बांधकाम, महिला बाल कल्याण व समाजकल्याण समिती आपल्यालाच मिळावी म्हणून काही सदस्यांनी नाथांच्या साथीने गुप्त फिल्डिंग लावली असल्याची चर्चा आहे. उपाध्यक्ष पद मिळाले नसल्यामुळे युतीतील काही सदस्य वरिष्ठांवर नाराज असून निष्ठे साठी त्यांनी त्यावेळी माघार घेतल्याचे सांगत होते. मात्र, आताही जर निष्ठेची शपथ देऊन कनिष्ठच राहा, असा सल्ला वजा आदेश वरिष्ठांनी दिल्यास बंड करण्याचे सुतोवाच काही इच्छुकांनी दिला आहे. त्यामुळे येत्या सात तारखेला विषय समितीच्या सभापती पदी कुणाची वर्णी लागणार व कुणाचे ठरलेले काम बिघडणार हे पाहाणे औत्सुकतेचे ठरणार आहे. 'माय दूरची व चुलती जवळची' ५२ सदस्य संख्या असलेल्या सभागृहात यावेळी समाज कल्याण समिती व महिला बाल कल्याण समितीच्या सभापतीपदाची निवड निवडणुकीद्वारे करण्यात येणार आहे. निवडणुकीनंतर सोबतच उर्वरित विषय समितींच्या दोन सभापतींची निवड करण्यात येणार आहे. त्यामुळे विषय समितींच्या सभापती पदासाठी महायुती व महाआघाडीच्या जि.प. सदस्यांनी फिल्डींग लावली असून सदस्य तळ्यात मळ्यात होवू नये म्हणून त्या पक्षाच्या राजकिय नेतेमंडळींनी आपल्या सदस्यांना टूर वर घेऊन गेले होते. दरम्यान विषय समितीच्या सभापती पदी आपली वर्णी लागावी म्हणून 'माय दूरची व चुलती जवळची' असा प्रकार घडल्यास आश्चर्य वाटून घेवू नये, असा अंदाज राजकिय विश्लेषकांनी व्यक्त केला आहे.