कोल्हापूर : हुपरीत जन्मदात्याचा लाकडी दांडक्याने मारून निर्घृण खून

हुपरी : म्हशीचे रेडकू बांधण्याच्या कारणावरून झालेल्या वादातून मुलाने वडिलांना लोखंडी पाईप, लाकडी दांडके याने जबर मारहाण केली. यात वडील आप्पासो कृष्णा नुल्ले (70) हे ठार झाले तर भांडण सोडवायला गेलेली संशयिताची आई व मुलगा यांनाही मारहाण करून जखमी करण्यात आले. याप्रकरणी हुपरी पोलिसांनी मुलगा अनिल आप्पासो नुल्ले (45, रा. गंगानगर हुपरी) याला अटक केली आहे. या घटनेमुळे परिसरात खळबळ उडाली आहे. ही घटना गुरुवारी (14 नोव्हेंबर) रात्री उशिरा घडली. याबाबतची फिर्याद संशयिताचा मुलगा अजित नुल्ले (20) याने हुपरी पोलिस ठाण्यात दिली आहे.

अनिल नुल्ले हा मद्यप्राशन करून आला होता. त्याने वडील आप्पासो नुल्ले यांच्याशी रेडकू बांधण्याच्या कारणावरून वाद घातला. तसेच तेथील लाकडी ओंडक्याने त्यांना बेदम मारहाण केली. या हाणामारीत आप्पासो यांच्या हात व पायाला तसेच डोक्यामध्ये जोराचा मार लागल्याने त्यांचा मृत्यू झाला. या मारहाणीत त्याने आई व आपल्या मुलालाही जखमी केले. घटनास्थळी पोलिस अधिकारी यांनी धाव घेत या घटनेची माहिती घेतली व अनिल यास ताब्यात घेतले.