गुणवत्ता विकास कार्यक्रमांतर्गत विविध स्पर्धांमध्ये 16 शाळांनी घेतला सहभाग:धानोरा केंद्रात गुणवत्ता व क्रीडा स्पर्धा उत्साहात; 150 विद्यार्थ्यांची उपस्थिती‎

येथील समुह साधन केंद्रात निपुण भारत अंतर्गत केंद्रस्तरीय गुणवत्ता विकास कार्यक्रमांतर्गत विविध स्पर्धांचे आयोजन केंद्र शाळा धानोरा येथे करण्यात आले. विद्यार्थ्यांच्या बौद्धिक व शारिरीक विकासासाठी दर वर्षी धानोरा केंद्रात गुणवत्ता स्पर्धा व क्रिडा स्पर्धेचे आयोजन करण्यात येते. निपुण भारत उपक्रमांतर्गत विद्यार्थ्यांच्या पायाभूत साक्षरता व संख्याज्ञान या घटकांवर प्रथम शाळा स्तरावर स्पर्धा घेऊन त्यात यश संपादन केलेल्या विद्यार्थ्यांना केंद्रस्तरावर सहभागी केले जाते. सकाळ सत्रात पायाभूत साक्षरता व संख्याज्ञान यात भाषा व गणित विषयासाठी इ.१ ली ते ४ थी पर्यंत च्या विद्यार्थ्यांची गुणवत्तेवर भाषा विषयांमध्ये श्रुतलेखन, बडबडगीत गायन, उतारालेखन,चित्रावरुन गोष्ट तयार करणे.या घटकांवर व गणितात १ ते १०० पर्यंत संख्या उलट म्हणणे, संख्याज्ञान व त्यावरील क्रिया, मापन या घटकांवर वर्गनिहाय गुणवत्ता तपासणी झाली. पर्यवेक्षक म्हणून सर्व शाळांतील नेमुन दिलेल्या शिक्षकांनी कामकाज केले.या सर्व कार्यक्रमाचे नियोजन केंद्रप्रमुख राकेश पाटील यांनी केले. दुपार सत्राची सुरुवात हि क्रीडा स्पर्धांनी झाली. यामध्ये इयत्तानिहाय वैयक्तिक खेळ सांघिक खेळांचा समावेश करण्यात आला होता. इ.४ थीच्या मुलांसाठी कबड्डी व मुलींसाठी लंगडीच्या स्पर्धा घेण्यात आल्या. तसेच वैयक्तिक खेळामध्ये दोरी उडी, लिंबू चमचा, तीन पायाची शर्यत, संगीत खुर्ची, इ.स्पर्धा घेण्यात आल्या. सर्वच स्पर्धांमध्ये विद्यार्थ्यांनी उत्साहाने सहभाग घेतला. या सर्व स्पर्धेत जिल्हा परिषदेच्या १६ शाळेतील १५० पेक्षा जास्त विद्यार्थ्यांनी सहभाग घेऊन कार्यक्रम यशस्वी केला.