जुन्या जिल्हाधिकारी कार्यालय रस्त्यावरील अतिक्रमणे हटवली

महापालिकेच्या अतिक्रमण हटाव मोहिमेला पुन्हा एकदा सुरूवात करण्यात आली आहे. बुधवारी (५ फेब्रुवारी) हातमपुरा चौक ते स्टेट बँक चौक रोडच्या दोन्ही बाजूला असलेली अतिक्रमणे कारवाई करून हटवण्यात आली. दरम्यान, शहरातील बाजारपेठ, नवी पेठ, गंज बाजारसह बालिकाश्रम रस्ता व सावेडी उपनगरातील प्रमुख चौकातील अतिक्रमणे हटवण्याकडे महापालिका दुर्लक्ष करीत असल्याचे चित्र आहे. मागील महिन्यात महापालिकेने अतिक्रमण हटाव मोहीम सुरू केली होती. काही उपनगरे, माळीवाडा, दिल्ली गेट, चौपाटी कारंजा परिसरात मोहीम राबवण्यात आली. मात्र, या ठिकाणी अतिक्रमणे पुन्हा जागेवर आल्याचे चित्र आहे. बुधवारी झालेल्या कारवाई टपऱ्या, हातगाड्या भंगारवाल्यांचे साहित्य, नाष्टा दुकाने व शर्मा पॉईंटची पत्रा शेड हटवण्यात आली. अतिक्रमण निर्मूलन विभाग प्रमुख आदित्य बल्लाळ साहेब, उपअभियंता सुरेश इथापे, झेंडीगेट प्रभाग अधिकारी श्यामर गोडळकर, क्षेत्रीय अधिकारी रिजवान शेख यांच्यासह पथकाने ही कारवाई केली. जप्त केलेल्या टपऱ्या, हातगाड्या रस्त्यावर महापालिकेच्या पथकाने जप्त केलेल्या हातगाड्या, टपऱ्या पुन्हा सोडून दिल्या जात असल्याने अतिक्रमण धारकांनी या हातगाड्या व टपऱ्या पुन्हा त्याच ठिकाणी लावून अतिक्रमण केले आहे. चौपाटी कारंजा रस्त्यावरही असाच प्रकार घडला आहे. त्यामुळे महापालिकेची कारवाई निव्वळ दिखावा ठरत आहे.