ठाणगावसह पाचगाव पाणी योजना ठप्प:3 लाखांवर बिल थकल्याने वीजपुरवठा खंडित‎

सिन्नर तालुक्यातील ठाणगाव सह पाचगाव पाणीपुरवठा योजनेचे तीन लाख दहा हजार रुपये विज बिल थकले आहे.महावितरण कंपनीने वीज पुरवठा खंडित केला आहे. गेल्या दोन दिवसांपासून ठाणगाव परिसरातील हिवरे, पिंपळे, पाडळी, टेंभुरवाडी या गावांना पाचगाव योजनेतून पाणीपुरवठा केला जातो. योजनेतील समाविष्ट गावांना दिवसाआड पाणीपुरवठा होतो. मात्र वीज पुरवठा खंडित केल्याने योजना ठप्प झाली आहे. वीज पुरवठ्याअभावी या गावांना गुरुवारपासून पाणी मिळाले नाही. योजना समितीकडून समाविष्ट गावांना वीज बिल भरण्याचे आवाहन करण्यात आले होते. यासाठी सूचना करूनही पाणीपट्टी भरण्याकडे संबंधित गावाने दुर्लक्ष केले. त्यामुळे महावितरणची थकीत रक्कम तीन लाख दहा हजारापर्यंत गेली. महावितरण कंपनीकडून योजना समितीला कळविले होते. परंतु वीज बिल भरण्यासाठी पाणीपट्टी जमा न झाल्याने महावितरणाला थकीत बिल देता आले नाही. पाचगाव योजनेत समाविष्ट गावांनी वीज देयक भरण्यासाठी सहकार्य करावे. ^पाणीपुरवठा योजना सुरळीत करण्यात अडचणी येत आहेत. कर्मचाऱ्यांचे पगार थकीत असल्याने नळ धारकांनी आपले बिल त्वरित भरून ग्रामपंचायतला सहकार्य करावे. -नामदेव शिंदे, सरपंच ^वीज वितरण कंपनीचे चालू बिल तीन लाख दहा हजार व मागील बिल पाचगाव पाणीपुरवठा योजनेकडे थकीत आहे. त्यामुळे वीजपुरवठा खंडित करावा लागला. -वैभव थोरे, वीज वितरण अधिकारी