ठेंगोड्यात सिद्धिविनायक मंदिरात 10 हजार भाविकांकडून दर्शन:झेंडू, गुलाब, मोगरा, जरबेराच्या 300 किलो फुलांपासून सजावट‎

ठेंगोडा येथील सिद्धिविनायक गणपती मंदिरात गणेश जयंती निमित्ताने जिल्हाभरातील १० हजार भाविकांनी दर्शन घेतले. १६ तास मेहनत घेऊन ३०० किलो फुलांनी मंदीर व गाभारा सजवण्यात आला होता. यात झेंडू, गुलाब, मोगरा, शेवंती, जरबेरा अशा विविध प्रकारच्या ३०० किलो विविध फुलांनी मंदिर व गाभारा सजवण्यात आला. गणेश जयंती निमित्ताने ठेंगोड्यातील मंदिरात तीन दिवस विविध कार्यक्रमाचे आयोजन करण्यात आले होते. गुरुवारी (दि. ३०) ग्राम प्रदक्षिणा व श्रींची मिरवणूक काढण्यात आली. शुक्रवारी (दि. ३१) प्रथम सत्रात शांतीपाठ, गणपती पुण्याह वाचन, मातृकापूजन, नांदीश्राद्ध, आचार्यपूजन, वास्तूपुजन, योगिनीपूजन, क्षेत्रपाल पूजन करण्यात आले. द्वितीय सत्रात प्रधानपूजन, अरनीमंथन, अग्निस्थापन, वर्धिनीपूजन, प्रधागणेश मूर्ती सहस्त्रावर्तन नवग्रहपूजन, रुद्रपूजन, नवग्रहहोम, प्रधानहोम सायंपूजा आरती पार पडली. शनिवारी (दि. १) वेदाचार्य पंडित किशोर जोशी यांच्या मार्गदर्शनाखाली प्रथम सत्रात शांतीपाठ, मंडलप्रातः पूजन, मूर्ती अभिषेक, उत्तरांगहवन पूजन करण्यात आल्याचे ट्रस्टचे अध्यक्ष यशवंत पाटील यांनी सांगितले. प्रतिनिधी | चांदवड शहरातील विविध गणेश मंदिरात शनिवारी (दि. १) गणेश जयंती धार्मिक वातावरणात उत्साहात साजरी करण्यात आली. यानिमित्त भाविकांनी विविध गणेश मंदिरात १० हजार भाविकांनी दर्शन घेतले. वडबारे रोडवरील इच्छापूर्ती गणेश मंदिर परिसर गर्दीने फुलून गेला होता. गाभारा परिसरात फुलांची आकर्षक सजावट करण्यात आली होती. शनिवारी नरेंद्र पाटील यांच्या हस्ते महापूजा पार पडली. १३ जोडप्यांच्या हस्ते गणेशयाग करण्यात आला. सत्यविनायक पूजन, पुर्णाहूती पार पडली. दुपारी गणेश जन्मोत्सव सोहळा पार पडला. जयसिंगराव धुमाळ यांचे शहनाई वादन पार पडले. राजेश कवडे यांच्यातर्फे महाप्रसादाचे वाटप करण्यात आले. महावीर जैन सेवा केंद्राने शुद्ध पाणीवाटप केले. रेणुका महिला भजनी मंडळाने भक्तिगीते सादर केली. छत्रपती शिवाजी महाराज चौकातील विघ्नहर्ता गणेश मंदिरात चंद्रेश्वर गडाचे महंत स्वामी जयदेवपुरी महाराज यांच्या उपस्थितीत श्री गणेश जन्मोत्सव, दुपारी महाप्रसाद वाटप करण्यात आले. याचा लाभ हजारो भाविकांनी घेतला. चांदवड येथील इच्छापूर्ती मंदिरात जयंतीनिमित्त गणेश याग करताना भाविक. सोमवार पेठेतील पगडी गणेश मंदिरात गणेश जन्मोत्सव सोहळा साजरा करण्यात आला. सकाळी श्रींचा महाअभिषेक, साडेनऊला सत्यनारायण महापूजा, दुपारी श्रींचा जन्मोत्सव सोहळा, महाआरती व प्रसादवाटप करण्यात आला. सायंकाळी महाआरतीनंतर ५६ भोग प्रसाद वाटप केला.