दर्यापूरमधील बंद घराला आग लागल्यानंतर सिलिंडरचा स्फोट:घरगुती साहित्य जळून खाक; जीवितहानी नाही, आर्थिक मदतीची मागणी

शहरातील एकवीरा स्कूल रोड लगतच्या नवीन पुनर्वसन नगरात एका बंद घराला अचानक आग लागली. त्यानंतर सिलिंडरचा स्फोट झाला. या आगीत संसारोपयोगी साहित्य पूर्णतः जळून खाक झाले. सुदैवाने या घटनेत कोणतीही जीवितहानी झाली नाही. ही घटना शनिवारी सायंकाळी ६.४५ वाजता घडली आहे. दर्यापुरातील पुनर्वसन नगर येथील सरला अशोक गिते यांच्या बंद घराला आग लागली. बघता-बघता आगीने मोठे रौद्ररूप धारण केले होते. घटनेची माहिती मिळताच तातडीने नगर परिषदेचे अग्निशमन दल कर्मचाऱ्यांसह घटनास्थळी पोहोचले. काही मिनिटांतच आगीवर नियंत्रण मिळवण्यात आले. काही वेळ वीजपुरवठा खंडित केला होता. तसेच घटनास्थळी पोलिस पथक व महावितरणचे कर्मचारी दाखल झाले होते. या वेळी बघ्याची मोठी गर्दी केली होती. सरला गीते यांची परीस्थिती अत्यंत हलाखीची असून, मोलमजुरी करून कुटुंबाचा उदरनिर्वाह चालवतात. प्रशासनाने तातडीने पंचनामा करून आगग्रस्त गिते कुटुंबास आर्थिक मदत देण्याची मागणी होत आहे.