दारू बंदीसाठी दरेभणगीतील महिलांचा एल्गार:कळवणच्या उपविभागीय पाेलिस अधिकाऱ्यांना महिलांकडून निवेदन‎

तालुक्यातील दरेभनगी गावातील महिलांनी गावात कायमची दारूबंदी लागू करावी या मागणीसाठी कळवण प्रशासकीय कार्यालयांवर धडक दिली. प्रांताधिकारी, पोलिस उपविभागीय अधिकारी, तहसीलदार, गटविकास अधिकारी आणि पोलिस निरीक्षक यांना मागण्यांचे निवेदन दिले. कळवण तालुक्यातील दरेभणगी गावातील महिला बचत गट, ग्रामस्थ आणि ग्रामपंचायत पदाधिकारी सदस्यांनी ग्रामसभेत एकत्र येऊन गावात दारूबंदी करण्याचा ठराव एकमताने मंजूर केला. गावात दारूची विक्री, वाहतूक आणि सेवन यावर संपूर्ण बंदी आणावी. तसेच, महाराष्ट्र दारूबंदी कायदा १९४९ नुसार योग्य ती कारवाई करून गावात दारूबंदी तातडीने लागू करावी असा ठराव घेण्यात आला. दारूच्या व्यसनामुळे अनेक कुटुंबे उद्ध्वस्त होत असून, घरगुती हिंसाचार, आरोग्य समस्या आणि सामाजिक अस्थिरता वाढत आहे. दारूमुळे महिलांना आणि मुलांना शारीरिक आणि मानसिक त्रास सहन करावा लागत आहे. त्यामुळे गावाच्या हितासाठी आणि उज्ज्वल भविष्यासाठी दारूबंदी त्वरित लागू करावी. केवळ दरेभनगी गावच नव्हे, तर संपूर्ण कळवण तालुक्यात व्यसनमुक्ती मोहिम राबवावी, शासकीय पातळीवर ठिकठिकाणी कॅम्प लावून जनजागृती करावी, व्यसनमुक्तीसाठी उपाययोजना राबवाव्यात. तरुण पिढीला व्यसनांपासून दूर ठेवण्यासाठी विशेष उपक्रम हाती घ्यावेत असे निवेदनात नमूद आहे. महिलांच्या मागणीची प्रशासनाकडून दखल घेतली जाते का? याकडे सर्वांचे लक्ष लागले आहे. ग्रामसभेत मंजूर ठरावानुसार प्रशासनाने त्वरित कारवाई करावी, अन्यथा तीव्र आंदोलनाचा इशारा महिलांनी दिला आहे. गावात कुठेही अवैध दारू विक्री होत असल्यास दोषींवर कठोर कारवाई करण्यात यावी, पोलिस प्रशासन व शासकीय विभागांनी परस्पर समन्वय साधून गावात संपूर्ण दारूबंदी लागू करावी, गावात दारूबंदीचा निर्णय घेण्यासाठी ग्रामसभेला कायदेशीर अधिकार असल्याने त्याची त्वरित अंमलबजावणीचा ठराव मंजूर केला.