नेवाशात 138 केंद्र संवेदनशील, वेबकास्टिंग होणार:नेवासे विधानसभा मतदारसंघातील 276 मतदान केंद्रांवर 1824 कर्मचारी रवाना

नेवासे विधानसभा निवडणुकीसाठी बुधवारी (२० नोव्हेंबर) होणाऱ्या मतदानासाठी प्रशासन व पोलिस यंत्रणा सज्ज झाल्याची माहिती निवडणूक निर्णय अधिकारी अरुण उंडे यांनी दिली. दुपारी एक वाजता नेवासे विधानसभा मतदारसंघातील सर्व ईव्हीएम मशीन स्ट्राँग रूममधून पोलिस बंदोबस्तात मतदान केंद्रावर रवाना झाल्या. उंडे म्हणाले, की नेवासे विधानसभेसाठी १ लाख ४५ हजार ९२७ पुरुष मतदार, १ लाख ३७ हजार १८० स्त्री मतदार, ४ तृतीयपंथीय व ३७८ शासकीय सेवेतील मतदार, असे एकूण २ लाख ८३ हजार १११ मतदार आहेत. नेवासे मतदारसंघातील २७६ मतदान केंद्रांवर १८२४ कर्मचारी नेमले आहेत. तालुक्यात १३८ संवेदनशील मतदान केंद्र असून, तेथे वेबकास्टिंग केले जाणार आहे. भेंडा फॅक्टरी, मुळा कारखाना व नेवासे खुर्द ही तीन आदर्श मतदान केंद्रे आहेत. मुकिंदपूर हे सखी मतदान केंद्र आहे. सुंदरबाई गांधी कन्या विद्यालय हे युवा मतदान केंद्र, तर नेवासे खुर्द येथे दिव्यांग मतदान केंद्र असणार आहे. मतदानाची वेळ ही सकाळी ७ वाजेपासून सायंकाळी ६ वाजेपर्यंत राहील. कोणत्याही मतदाराला मतदान केंद्राच्या १०० मीटर परिसरात मोबाईल बंदी असणार आहे. नेवासे विधानसभा मतदार संघातील निवडणूक बंदोबस्ताविषयी माहिती देताना पोलीस निरीक्षक धनंजय जाधव यांनी सांगितले, की बंदोबस्तासाठी एक पोलिस उपअधीक्षक, तीन पोलिस निरीक्षक, १२ सहायक पोलिस निरीक्षक, २२५ पोलिस कर्मचारी, २६४ होमगार्ड व१२ हाफ सेक्शन केंद्रीय सशस्त्र सुरक्षा बल, ६ मायक्रो ऑब्जवर असे कर्मचारी बंदोबस्तासाठी सज्ज आहेत.