पतसंस्था चळवळीमुळे ग्रामीण जनतेची पत वाढली:अकोले येथील सहकार दिंडीच्या कार्यक्रमामध्ये ज्येष्ठ नेते मधुकरराव नवले यांचे मत

राज्यभरात सहकारी पतसंस्थाच्या माध्यमातून शहरी व खासकरून ग्रामीण भागांतील जनतेची आर्थिक पत वाढवण्याचे काम झाले. गरीब कुटुंबातील महिलांसह सर्वसामान्य जनतेसाठी या सहकारी पतसंस्था मोठा आर्थिक आधार ठरल्या. सहकारी पतसंस्थांमुळेच गरिबांच्या जीवनात आर्थिक स्थैर्य व समृद्धी आली. सहकार क्षेत्रात महाराष्ट्राला काका कोयटे‌ यांच्यासारखे कणखर, दृष्टे व कार्यक्षम नेतृत्व लाभल्याने सहकारी पतसंस्था चळवळीला नवी दिशा मिळाली, असा विश्वास अकोल्यातील बुवासाहेब नवले ग्रामीण बिगर शेती सहकारी पतसंस्थेचे संस्थापक अध्यक्ष मधुकरराव नवले यांनी व्यक्त केला. महाराष्ट्र राज्य सहकारी पतसंस्था फेडरेशन आयोजित स्व. डॉ. धनंजयराव गाडगीळ सहकार दिंडीचे बुधवारी अकोले येथे आगमन झाले. ही दिंडी शहरातील प्रमुख रस्त्यावरून फिरून बुवासाहेब नवले क्रेडिट सोसायटीच्या प्रांगणात आली. यानंतर दिंडी येथील अगस्ती विद्यालयाच्या प्रांगणात विसावली. तेथे अकोल्याचे सहाय्यक निबंधक अमोल वाघमारे, अकोले तालुका सहकारी पतसंस्था फेडरेशन तालुकाध्यक्ष भाऊपाटील नवले, अगस्ती पतसंस्थेचे अध्यक्ष अशोकराव देशमुख, दूधगंगा पतसंस्थेचे अध्यक्ष नितीन चासकर आदींनी दिंडीचे स्वागत करून पालखीचे पूजन केले. याप्रसंगी ज्येष्ठ नेते मधुकर नवले बोलत होते. यावेळी अर्थवेद पतसंस्थेचे अध्यक्ष प्रा. बी. एम. महाले, शिक्षक सहकारी पतसंस्थेचे अध्यक्ष दीपक जोंधळे, लक्ष्मी पतसंस्थेचे अध्यक्ष प्रवीण मालुंजकर, महालक्ष्मी पतसंस्थेचे अध्यक्ष सचिन शिंदे, लिंगेश्वर पतसंस्थेचे अध्यक्ष प्रभाकर फापाळे, विवेकानंद पतसंस्थेचे बाळासाहेब आंबरे, स्वामी समर्थ पतसंस्थेच्या अध्यक्ष मंगला तळपाडे, महिला ग्रामीण पतसंस्थेच्या अध्यक्ष अॅड मंगला हांडे, प्रवरा पतसंस्थेचे अध्यक्ष भास्कर मंडलिक, अकोले पतसंस्थेचे अध्यक्ष नंदू मैड, धनश्री पतसंस्थेचे अध्यक्ष विलास आरोटे, बुवासाहेब नवले पतसंस्थेच्या संचालिका मंदाताई नवले, तालुका फेडरेशनचे व्यवस्थापक आर. एम. धुमाळ, नवनाथ भोर, जनलक्ष्मी पतसंस्थेचे कार्यकारी संचालक आत्माराम रंधे, अगस्ती पतसंस्थेचे मुख्य व्यवस्थापक दिलीप उदमले आदी उपस्थित होते.