पतित पावन संघटनेला मिळाला नवा प्रवक्ता:अली दारुवाला यांची महाराष्ट्र प्रांत प्रवक्तेपदी नियुक्ती; लव्ह जिहाद, गोहत्या रोखण्यासाठी कठोर पावले

पुण्यातील बोट क्लब येथे पतित पावन संघटनेच्या महाराष्ट्र प्रांत प्रवक्तापदी अली दारुवाला यांची नियुक्ती करण्यात आली. प्रांत सरचिटणीस नितीन सोनटक्के यांच्या हस्ते दारुवाला यांना नियुक्तीपत्र प्रदान करण्यात आले. कार्यक्रमाला प्रांत उपाध्यक्ष बाळासाहेब भामरे, प्रांत संपर्कप्रमुख राकेश मोटे, पुणे शहर अध्यक्ष श्रीकांत शिळीमकर यांच्यासह अनेक पदाधिकारी उपस्थित होते. नवनियुक्त प्रवक्ते अली दारुवाला यांनी समाजातील ज्वलंत प्रश्नांवर लक्ष केंद्रित करण्याचे आश्वासन दिले. विशेषतः लव्ह जिहाद, लँड जिहाद आणि वोट जिहाद यासारख्या गंभीर समस्यांवर संघटना विशेष लक्ष देणार असल्याचे त्यांनी सांगितले. या समस्यांबाबत शासनाकडे पाठपुरावा करण्यात येणार असून, शासनाने दुर्लक्ष केल्यास संघटना आपल्या पद्धतीने आंदोलन करेल, असा इशाराही त्यांनी दिला. दारुवाला यांनी पुण्यातील वाढत्या व्यसनाधीनतेबद्दल चिंता व्यक्त केली. शिक्षणाचे माहेरघर म्हणून ओळखल्या जाणाऱ्या पुण्याचे व्यसनाचे केंद्र होण्याकडे होत असलेले रूपांतर रोखण्याची गरज त्यांनी अधोरेखित केली. तसेच वाढत्या गोहत्येच्या प्रकरणांवर कठोर कारवाई करण्याचा संकल्पही त्यांनी व्यक्त केला. नितीन सोनटक्के यांनी दारुवाला यांच्या नियुक्तीमागील कारणे स्पष्ट केली. संघटनेत आधी नसलेले प्रवक्तेपद दारुवाला यांच्या वक्तृत्व कौशल्यामुळे निर्माण करण्यात आले असून, ते या जबाबदारीला योग्य न्याय देतील असा विश्वास त्यांनी व्यक्त केला.