महसूलमंत्र्यांच्या निर्णयाने लासलगावकरांना दिलासा:वर्ग-2 च्या जमिनी‎वर्ग-1 मध्ये करण्यास‎ मुदतवाढ‎

येथील सर्व्हे नं. ९३ मधील भोगवटादार वर्ग-२ च्या जमिनी भोगवटादार वर्ग-१ मध्ये रुपांतरित करण्यासाठी महसूलमंत्री चंद्रशेखर बावनकुळे यांनी मुदतवाढीसंदर्भात आदेश दिल्याने अनेक वर्षे प्रलंबित असलेला लासलगाव येथील अनेक रहिवाशांचा प्रश्न सुटण्यास मदत होणार आहे. माजी उपमुख्यमंत्री छगन भुजबळआणि भाजपच्या महामंत्री सुवर्णा जगताप यांच्या पाठपुराव्यानंतर लासलगाव येथील शिष्ठमंडळात शैलेश ठाकरे, मयूर झांबरे यांनी मंत्रालयात बावनकुळे यांची भेट घेऊन चर्चा केली. अशा प्रकारच्या महाराष्ट्रातील इतर प्रकरणांची दखल घेऊन मंत्रिमंडळाच्या सभेत प्रश्न मांडत परिपत्रक काढले आहे. या परिपत्रकामुळे तळागाळातील रहिवाशांचे प्रश्न मार्गी लागण्यास मोठी मदत होणार आहे. शेती, अकृषिक, निवासी, वाणिज्यिक अथवा औद्योगिक प्रयोजनासाठी तसेच सहकारी गृहनिर्माण संस्थांना भाडेपट्ट्याने किंवा कब्जे हक्काने दिलेल्या शासकीय भोगवटादार वर्ग-२ च्या जमिनी भोगवटदार वर्ग - १ मध्ये रुपांतरीत करताना कमी अधिमूल्य आकारण्याच्या अभय योजनेस एक वर्षांची मुदतवाढ दिल्याचे जगताप यांनी सांगितले.