मुख्यमंत्र्यांना सत्तेचा माज:बीड आणि परभणी प्रकरण फास्ट ट्रॅक कोर्टात चालवा, आनंदराज आंबेडकरांची मागणी

बीडमधील मस्साजोग गावाचे सरपंच संतोष देशमुख यांचे अपहरण करुन निर्घृणपणे हत्या करण्यात आली. या प्रकरणामुळे राज्याचे राजकारण तापले आहे. देशमुख कुटुंबीयांना न्याय मिळावा यासाठी छत्रपती संभाजीनगरमध्ये जनआक्रोश मोर्चा काढण्यात आला. यावेळी माध्यमांशी संवाद साधताना आनंदराज आंबेडकर यांनी मुख्यमंत्री देवेंद्र फडणवीस यांच्यावर टीका केली आहे. मुख्यमंत्र्यांना सत्तेचा माज आला आहे, अशा भाषेत त्यांनी टीका केली आहे. आनंदराज आंबेडकर म्हणाले, सोमनाथ सूर्यवंशींच्या अंगावर काळे-निळे वण होते, त्याला मारहाण झाल्यामुळेच कोठडीत मृत्यू झाला होता हे स्पष्ट असतानाही मुख्यमंत्री देवेंद्र फडणवीस यांनी त्यावर विधानसभेत हास्यास्पद निवेदन दिले. त्यांना सत्तेचा माज आला आहे. बीड आणि परभणी हत्या प्रकरण हे फास्ट ट्रॅक कोर्टात चालवले पाहिजे, अशी मागणी देखील आनंदराज आंबेडकर यांनी केली आहे. पुढे बोलताना आनंदराज आंबेडकर म्हणाले, बीडमध्ये कोंबिंग ऑपरेशन करून आरोपी का पकडले नाहीत? तुमच्यातील चोरलफंगे चांगले आणि विरोधातील लोक वाईट हे योग्य नाही. महाराष्ट्रात असंतोषाचा उद्रेक होऊ देऊ नका. असंतोषाचा उद्रेक झाला तर संख्याबळ असलेले तुमचे सरकार कुठे गडप होईल याचा पत्ता लागणार नाही, असा इशारा आनंदराज आंबेडकर यांनी दिला आहे. दरम्यान, यावेळी मोर्चात भाषण करताना मनोज जरांगे पाटील यांनी देखील जोरदार हल्लाबोल केला आहे. मनोज जरांगे पाटील म्हणाले, ज्या दिवशी आम्हाला असे वाटेल की या आरोपीमधून एकही आरोपी सुटणार आहे, त्या दिवशी आम्ही रस्त्यावर उतरणार हे मुख्यमंत्री साहेबांनी लक्षात घ्यावे. सूर्यवंशी कुटुंबाला आणि देशमुख कुटुंबाला न्याय मिळाल्याशिवाय शांत बसणार नाही. कोण कसा डाव टाकत आहे याकडे आपण लक्ष दिले पाहिजे, यांना कुठलीही चाल आपण खेळू द्यायची नाही. राजकारण ही राजकारणाच्या ठिकाणी असते, ज्या वेळेस एक लेक टाहो फोडते, ज्या वेळेस एक भाऊ न्यायासाठी वणवण फिरतो त्यावेळेस समाजाने त्यांच्या पाठीशी उभे असणे गरजेचे आहे.