मूळ नगरच्या फौजदाराची लोणावळ्याजवळ आत्महत्या:टायगर पॉइंट येथे सापडला मृतदेह, कारण अस्पष्ट

पुणे आयुक्तालयातील खडकी येथील पोलिस उपनिरीक्षकाने लोणावळा टायगर पॉइंट येथे गळफास घेऊन आत्महत्या केल्याची धक्कादायक घटना शुक्रवारी उघडकीस आली आहे. अण्णा बादशहा गुंजाळ (रा. खंडगाव, ता. जि.संगमनेर, अहिल्यानगर) असे मृताचे नाव आहे. पोलिसांनी दिलेल्या माहितीनुसार, पोलिसांना ११२ या आपत्कालीन संपर्क क्रमांकावर फोन आला होता. त्यानुसार शिवलिंग पॉइंटजवळ एका व्यक्तीचा मृतदेह झाडाला लटकल्याची माहिती पोलिसांना मिळाली. पोलिसांनी घटनास्थळी जाऊन पाहिले असता आत्महत्या केलेल्या ठिकाणाजवळ एक कार (एमएच १७ सीएम ९६९७) उभी होती. गाडी मालकाची माहिती घेतली असता मालकाचे नाव अण्णा बादशहा गुंजाळ असल्याचे समजले. त्या गावच्या पोलिस पाटलांशी संपर्क साधल्यानंतर ही गाडी अण्णा गुंजाळ यांचीच असून ते खडकी पोलिस ठाण्यात कार्यरत असल्याचे पोलिसांना समजले. पोलिसांनी खडकी पोलिस ठाण्याशी संपर्क केला असता, गुंजाळ हे तिथे पोलिस उपनिरीक्षक पदावर कार्यरत आहेत व ते तीन दिवसांपासून गैरहजर होते आणि त्यांचा फोन लागत नव्हता. दरम्यान, त्यांनी आत्महत्या का केली याचे कारण समजू शकले नाही. दरम्यान, गुंजाळ यांना मानसिक तणाव होता का? किंवा त्यांना कुणी त्रास दिला का? याचाही तपास करण्यात येणार असल्याचे सांगण्यात येत आहे. अहिल्यानगर जिल्ह्यातील त्यांच्या मूळ गावीही चौकशी होण्याची शक्यता आहे.