राज्याभिषेकासाठी 56 देशांतून नजराणा, 110 मुला-मुलींचा धर्म संस्कार सोहळा:आढीवमधील तपोवनमध्ये कार्यक्रमाला भाविकांची गर्दी होती

आढीव (ता. पंढरपूर) येथील डॉ. शीतल शहा यांच्या तपोवन शेतमळा येथे सुरू असलेल्या पंच कल्याणक महोत्सवाच्या तिसऱ्या दिवशी राज्याभिषेक सोहळा, ११० मुला- मुलींना धर्म संस्कार सोहळा आणि आचार्य विशुद्ध सागर महाराज यांचे प्रवचन संपन्न झाले. तिसऱ्या दिवशी महोत्सवास पाच हजारांहून अधिक श्रावक आणि श्राविकानी उपस्थिती लावली. तपोवन भूमीला अध्यात्मिक नगरीचे स्वरूप आले आहे. आढीव येथील तपोवन शेत मळ्यात डॉ. शीतल शहा यांनी सुमारे एक कोटी रुपये खर्चून भव्य, मखराना मार्बलमध्ये मंदिर उभारले असून त्यामध्ये श्री १००८ मुनीसूवरत्न तीर्थंकर यांच्या संगमरवरी मूर्तीची प्रतिष्ठापना केली आहे. त्यानिमित्त मध्य प्रदेशातील आचार्य विशुध्द सागर महाराज आणि ३० जैन मुनी उपस्थित झाले आहेत. पाच दिवस चालणाऱ्या या पंच कल्याणक महोत्सवानिमित्त तपोवन भूमीत दररोज हजारो भाविक दर्शनासाठी, आणि प्रवाचानासाठी येत आहेत. त्यानंतर आचार्य विशुद्धसागर यांचे मंगल प्रवचन संपन्न झाले. दुपारी बारा वाजता धर्मसभा, व्याख्यान संपन्न झाल्यानंतर दुपारी दोन वाजता राज्याभिषेक सोहळा मोठ्या थाटामाटात संपन्न झाला. यावेळी ५६ देशांतील राजदुताकडून आलेल्या नजराना अर्पण करण्यात आला. यानंतर दरबारी नृत्य, वैराग्य भावना, लोकांतीक देवागमन, वैराग्य स्मृती व दीक्षा कल्याण असे धार्मिक कार्यक्रम संपन्न झाले. या वेळी भक्त उपस्थित होते. सकाळी सहा वाजता केला मंगलवाद्य घोष, जपानुष्ठान सोमवारी पंचकल्याणक महोत्सवाच्या तिसऱ्या दिवशी सकाळी सहा वाजता मंगलवाद्य घोष करण्यात आला. त्यानंतर जपानुष्ठान, श्री जिनाभिषेक व शांतीधारा विधी संपन्न झाले. त्यानंतर सकाळी आठ वाजल्यापासून ६५ मुले आणि ५४ मुलींवर धार्मिक उपनयन संस्कार करण्यात आले. पंडित वृषभक्षण उपाध्ये यांच्या उपस्थितीत मुलांवर उपनयन संस्कार करण्यात आले. डॉ. शहा यांना सकल जैन समाजाकडून मानपत्र यावेळी सकल जैन समाजाच्यावतीने डॉ. शीतल शहा यांनी वैद्यकीय, सामाजिक, शैक्षणिक आणि अध्यात्मिक क्षेत्रात गेल्या चाळीस वर्षात केलेल्या कार्याबद्दल आमदार समाधान आवताडे यांच्या हस्ते सन्मानचिन्ह व मानपत्र देऊन सन्मान करण्यात आला. यावेळी सहकार शिरोमणी वसंतराव काळे सहकारी साखर कारखान्याचे चेअरमन कल्याणराव काळे उपस्थित होते. या कार्यक्रमाचे सूत्रसंचालन अरुण खडके यांनी केले .