रेल्वे प्रवाशांसाठी आनंदाची बातमी:नांदेड विभागातील सर्व 70 रेल्वे स्थानकांवरील तिकीट काउंटरवर QR कोड सुविधा, प्रवाशांची होणार सोय

नांदेड विभागात यूटीएस आणि पीआरएस काउंटरद्वारे तिकीट खरेदी करणे आता क्यूआर कोड सुविधेमुळे अधिक सोपे झाले आहे.विभागातील ७० रेल्वे स्थानकावर ही सेवा उपलब्ध करण्यात आली आहे. त्यामुळे प्रवाशांची मोठी सोय झाली आहे नांदेड रेल्वे विभाग अंतर्गत सत्तर रेल्वे स्थानक आहेत. या रेल्वे स्थानकावरून प्रवाशांच्या सुविधेसाठी वेळोवेळी लक्ष दिले जाते. प्रवाशांना कुठल्याही प्रकारचे काय सुविचा सामना करावा लागणार नाही याकडे रेल्वे खात्याकडून वेळोवेळी काळजी घेतली जात आहे. रेल्वे स्थानकावर तिकीट खरेदीसाठी प्रवाशांची होणारी गर्दी, सुट्या पैशासाठी प्रवाशांची होणारी धावपळ लक्षात घेऊन रेल्वे प्रशासनाने सुरुवातीला काही प्रमुख स्थानकांवर तिकीट खरेदीसाठी क्यू आर कोड ची सुविधा उपलब्ध केली होती. त्यामुळे प्रवाशांची मोठी सोय झाली. नांदेड विभाग व्यवसाय सुलभ करण्यासाठी आणि आर्थिक व्यवहार कमी करण्यासाठी सर्वत्र डिजिटल पेमेंटला प्रोत्साहन देत आहे. अधिक मार्गांनी कॅशलेस व्यवहारांना प्रोत्साहन देण्यासाठी आणि सामान्य बुकिंग आणि आरक्षण काउंटरवरही डिजिटल पेमेंट वाढवण्यासाठी, नांदेड विभागाने तिकीट खरेदीसाठी QR (क्विक रिस्पॉन्स) कोडद्वारे तिकीट भाडे भरण्याची अतिरिक्त सुविधा सुरू केली आहे. यामुळे त्वरित तिकिटे खरेदी करण्याव्यतिरिक्त रोख पैसे घेऊन जाण्याची आणि टिकीटाची अचूक रक्कम देणे सुलभ झाले आहे त्यानंतर आता या सेवेचा विस्तार करण्यात आला असून नांदेड विभागातील सर्व ७० स्थानकांच्या सर्व तिकीट काउंटरवर तिकीट खिडकीच्या बाहेर स्वतंत्र उपकरणे देण्यात आली आहेत. तिकिट जारी करण्यासाठीचे सर्व संबंधित तपशील सिस्टीममध्ये भरल्यानंतर, पेमेंट स्वीकारण्यापूर्वी, या उपकरणांवर QR कोड प्रदर्शित केला जातो आणि तो प्रवासी मोबाईल फोनमध्ये असलेल्या पेमेंट ॲप्सद्वारे स्कॅन करू शकतात. रक्कम मिळाल्याची खात्री झाल्यानंतर, तिकीट तयार केले जाईल आणि प्रवाशाला दिले जाईल. रेल्वे वापरकर्त्यांसाठी कॅशलेस व्यवहाराची ही सुविधा सुरुवातीला महत्त्वाच्या स्थानकांच्या प्रमुख काउंटरवर लागू करण्यात आली होती, ती आता विभागातील सर्व काउंटरवर उपलब्ध करून देण्यात आली आहे. यामुळे रेल्वे प्रवास करणाऱ्या हजारो प्रवाशांची मोठी सोय झाली आहे.