वसमतमध्ये विद्यार्थ्याला भोसकले:दोघांवर गुन्हा दाखल, पोलिसांकडून आरोपींचा शोध सुरू

वसमत येथील जिल्हा परिषद शाळेच्या आवारात किरकोळ कारणावरून विद्यार्थ्याला चाकूने भोसकणाऱ्या दोघांवर वसमत शहर पोलिस ठाण्यात मंगळवारी ता. 28 रात्री उशीरा गुन्हा दाखल झाला आहे. पोलिसांनी दोघांचा शोध सुरु केला आहे. तर दुसरीकडे जखमी विद्यार्थ्यावर नांदेड येथे शस्त्रक्रिया करण्यात आल्याचे सुत्रांनी सांगितले. पोलिसांनी दिलेल्या माहितीनुसार, वसमत येथील जिल्हा परिषद शाळेच्या आवारामध्ये इयत्ता दहावी वर्गातील विद्यार्थी योगेश नादरे हा मंगळवारी ता. 28 दुपारी सराव परिक्षा देण्यासाठी शाळेत गेला होता. यावेळी त्याचा काही विद्यार्थी पाठीमागून खडे मारीत होते. याबाबत योगेश याने जाब विचारला असता वादाला तोंड फुटले. या वादामध्ये शाब्दीक चकमकीनंतर हाणामारी झाली. यामध्ये योगेश यास त्याच्या वर्गातीलच दोन विद्यार्थ्यांनी मारहाण करून चाकूने भोसकले. त्याच्या हाताला व छातीवर गंभीर दुखापत झाली आहे. पोलिस निरीक्षक सुधीर वाघ, उपनिरीक्षक शिवाजी बोंडले, जमादार गजानन भोपे यांच्या पथकाने जखमी योगेश यास उपचारासाठी नांदेडला हलविले. त्या ठिकाणी त्याच्यावर शस्त्रक्रिया करण्यात आली असून त्याची प्रकृती सुधारत असल्याचे सांगण्यात आले आहे. याप्रकरणी योगेशचे वडिल उद्धव नादरे यांनी रात्री उशीरा वसमत पोलिस ठाण्यात तक्रार दाखल केली. यावरून पोलिसांनी गणेशपूर येथील दोन विद्यार्थ्यांवर गुन्हा दाखल केला आहे. त्यानंतर सहाय्यक पोलिस निरीक्षक विशाल भोसले, बी. जी. महाजन, जमादार गजानन भोपे यांच्या पथकाने रात्री उशीरापर्यंत गणेशपूर परिसरात शोध मोहिम सुरु केली होती. मात्र दोघेही पोलिसांना सापडले नाहीत. पोलिसांनी त्यांचा शोध सुरु केला असून ते दोघेही अल्पवयीन आहेत काय याची माहिती घेण्यास पोलिसांनी सुरवात केली आहे.