विदर्भात येणार आशिया खंडातील सर्वात मोठे विमानचालक प्रशिक्षण केंद्र:अमरावतीत दरवर्षी 25 हजार पायलट होणार तयार; वर्धा, चंद्रपूर, नागपुरात नवे प्रकल्प

नागपूर येथील राष्ट्रसंत तुकडोजी महाराज विद्यापीठात 'अॅडव्हांटेज विदर्भ २०२५-खासदार औद्योगिक महोत्सवा'चे उद्घाटन मुख्यमंत्री देवेंद्र फडणवीस यांच्या हस्ते करण्यात आले. या वेळी त्यांनी विदर्भाच्या विकासासाठी अनेक महत्त्वपूर्ण घोषणा केल्या. अमरावती येथे आशिया खंडातील सर्वात मोठे विमानचालक प्रशिक्षण केंद्र उभारण्यात येणार असून, यातून दरवर्षी २५ हजार विमानचालक प्रशिक्षित होणार आहेत. मुख्यमंत्र्यांनी विदर्भातील विविध विकास प्रकल्पांची माहिती दिली. वर्धा जिल्ह्यात ड्रायपोर्टसह इलेक्ट्रॉनिक बस हब निर्माण होणार आहे. पुढील ४ वर्षांत चंद्रपूर येथे कोल गॅसिफिकेशन प्रकल्प उभारला जाणार आहे. नागपूर विमानतळाचा विकास दुबई विमानतळ हबच्या धर्तीवर करण्यात येणार आहे. केंद्रीय मंत्री नितीन गडकरी यांनी विदर्भातील सर्व जिल्ह्यांमध्ये उद्योग वाढीसाठी पुढील ४ वर्षांत विशेष प्रयत्न करण्याचे आश्वासन दिले. जे.एस.डब्ल्यू. समूहाचे सज्जन जिंदल यांनी गडचिरोलीसह विदर्भात ३ लाख कोटींची गुंतवणूक करण्याची घोषणा केली. एचसीएल कंपनीने मिहानमध्ये आधीच ५,५०० लोकांना रोजगार दिला असून, त्यात ४०% महिला आहेत. लॉईड मेटल्सने गडचिरोली जिल्ह्यात येत्या दोन वर्षांत १० हजार रोजगार निर्माण करण्याचे आश्वासन दिले आहे.