शहरातील 14 शाळांतील 100 गरजू विद्यार्थ्यांना दप्तर:गणेश जयंतीनिमित्त दातरंगे मळ्यातील श्री एकदंत गणेश मंडळ गेल्या पाच वर्षांपासून राबवत आहे उपक्रम‎

एकदंत कॉलनी, दातरंगे मळ्यात श्री एकदंत गणेश मंडळाच्या वतीने गणेश जयंती निमित्त नगर शहरातील विविध १४ शाळांतील १०० गरजू विद्यार्थ्यांना दप्तर वाटप करण्यात आले. श्री गणेश जयंती निमित्त एक पाऊल गरजू विद्यार्थ्यांसाठी शैक्षणिक मदत हा उपक्रम राबवण्यात आला. शाळा ही सर्वांगीण विकासाचा पाया भक्कम करणारे एक माध्यम आहे. शाळेमुळे सर्वांगीण विकास म्हणजेच बौद्धिक विकास, सामाजिक विकास, मानसिक विकास, शारीरिक विकास व नैतिक विकास होत असतो. त्यामुळे प्रत्येकाने शिक्षण घेतलेच पाहिजे. पण आजच्या या महागाईच्या काळात शिक्षण सुद्धा खर्चिक बनले आहे. अनेक लोकांचे आर्थिक परिस्थिती बिकट असल्याने त्यांच्या मुलांना शिक्षणापासून वंचित ठेवावे लागते. अशा गरजू विद्यार्थ्यांना मदतीचा हात मिळावा या उद्देशाने जयंतीनिमित्त धार्मिक कार्यक्रमाला सामाजिकतेची जोड देऊन हा शैक्षणिक साहित्य वाटपाचा कार्यक्रम घेण्यात आला या उपक्रमात नगर शहरातील महंत पंडित सूच्चासिंग विद्यालय, जानकीबाई आपटे मतिमंद शाळा, मार्कंडेय विद्यालय, गांधी मैदान, महर्षी ग. ज. चीतांबर विद्या मंदिर, सबजेल चौक, शारदा मंदिर, मार्कंडेय विद्यालय, श्रमिक नगर, संस्कृती कनोरे विद्यालय, कै. वी. ल. कुलकर्णी प्राथमिक शाळा, मनोहरलाल रामचंद सबलोक प्राथमिक विद्यालय, दादा चौढारी विद्यालय, सिताराम सारडा महाविद्यालय, प्रगत विद्यालय, बत्तीन पोट्यान्ना प्राथमिक शाळा, महिला मंडळ बालक मंदिर या १४ शाळेतील १०० गरजू विद्यार्थ्यांना दप्तर देण्यात आले. प्रास्तविकात विनोदा बेत्ती म्हणाल्या, मंडळाच्या वतीने २१ वर्षांपासून गणेश जयंतीत सामाजिक उपक्रमांनी राबविण्यात येत आहे. यात सामुदायिक विवाह, रक्तदान शिबीर, नेत्र तपासणी, दंत तपासणी, मोफत मोतिबिंदू शस्त्रक्रिया, मोफत औषध वाटप शिबीर, गरजू विद्यार्थ्यांना शैक्षणिक साहित्य वाटप शिबीर राबविण्यात येतात. आजपर्यंत समाजातील नागरिकांना व अनेक विद्यार्थ्यांना आणि रुग्णांना यांचा मोठा लाभ मिळत आहे. शालेय विद्यार्थ्यांना दप्तर वाटप उपक्रम गेल्या पाच वर्षापासून राबविण्यात येत आहे. सुत्रसंचालन रोशन सुंकी यांनी, तर आभार कविता मंचे यांनी मानले.