शालेय उपक्रमातून कलागुणांच्या विकासाला चालना:म्हसदी येथे सी.डी. देवरे विद्यालयात आमदार मंजुळा गावित यांचे प्रतिपादन, कार्यक्रमात विद्यार्थ्यांना केले मार्गदर्शन

शाळेत विद्यार्थ्यांसाठी विविध उपक्रम राबवण्यात येतात, यातून विद्यार्थ्यांच्या कलागुणांना चालना मिळत असते, त्यामुळे विद्यार्थ्यांनी शालेय अभ्यासासोबत इतरही उपक्रमांमध्ये सहभागी होण्याचे आवाहन आमदार मंजुळा गावित यांनी केले. येथील सी.डी. देवरे माध्यमिक व उच्च माध्यमिक विद्यालयात माता पालक मेळाव्याचे आयोजन करण्यात आले. कार्यक्रमाच्या अध्यक्षस्थानी प्राचार्य एस.ए. देवरे, शालेय समितीच्या अध्यक्षा मालती ठाकरे, आमदार मंजुळा गावित, शिवसेना उपनेत्या शुभांगी पाटील, पोलिस निरीक्षक नयना देवरे, पोलिस निरीक्षक माधवी वाघ, शिवसेना उपजिल्हाप्रमुख राजधर देसले, सदस्य जिल्हा नियोजन समिती, विनायक देवरे शालेय व्यवस्थापन समितीचे अध्यक्ष व उपाध्यक्ष सुभान पिंजारी, माजी अध्यक्ष दिलीप देवरे आदी उपस्थित होते. प्रास्ताविक प्राचार्य एस.ए. देवरे यांनी केले. विद्यालयातील विविध शैक्षणिक योजनेची माहिती माता पालक यांना दिली. तालुकास्तरीय विज्ञान प्रदर्शन, वक्तृत्व स्पर्धा राज्यस्तरीय निबंध स्पर्धा, वरिष्ठ विभागस्तरीय निबंध स्पर्धा, तालुकास्तरीय विज्ञान प्रश्नमंजुषा व स्काऊट- गाइड शिबिरातील सर्व स्पर्धकांना मान्यवरांच्या हस्ते स्मृतिचिन्ह व प्रमाणपत्र देऊन गौरवण्यात आले. कार्यक्रमाचे सूत्रसंचालन प्रा.एस.व्ही. सूर्यवंशी यांनी केले. आभार प्रा.एस.पी. पाटील यांनी मानले. मुलांमध्ये चांगल्या विचारांची पेरणी करा प्रा.यू.एस. देवरे यांनी‌‌ माता पालक मेळावा निमित्ताने मार्गदर्शन करताना सांगितले की, मातांनी मुलांना चांगले संस्कार देऊन आदर्श नागरिक होण्यासाठी संवाद साधला पाहिजे. मुलांना राजमाता जिजाऊ, सावित्रीबाई फुले, श्यामची आई यांच्या विचारांची पेरणी मुलांमध्ये केली पाहिजे. अॅड. शुभांगी पाटील यांनी मुलांशी व माता-भगिनींशी संवाद साधताना अनेक उदाहरण देऊन मुलांना कसे घडवावे? याबद्दल विचार विशद केले.