शिक्षण क्षेत्रातील महत्त्वाच्या मागण्यांसाठी आक्रमक:नेट-सेट, पीएचडीधारक संघटनेचे संत गाडगेबाबा विद्यापीठात पाच तास धरणे आंदोलन

शिक्षण क्षेत्रातील गंभीर समस्यांवर लक्ष वेधण्यासाठी नेट-सेट, पीएचडीधारक संघटनेने बुधवारी संत गाडगेबाबा अमरावती विद्यापीठाच्या प्रवेशद्वारावर जोरदार आंदोलन केले. राष्ट्रीय शैक्षणिक धोरण (एनइपी) रद्द करणे, सेमिस्टर परीक्षा पद्धत बंद करणे आणि प्राध्यापकांची रिक्त पदे भरणे या प्रमुख मागण्यांसाठी हे आंदोलन करण्यात आले. संघटनेचे समन्वयक स्वप्नील देशमुख, मंगेश ठाकरे आणि कैलास चव्हाण यांच्या नेतृत्वाखाली झालेल्या या आंदोलनाला विविध संघटनांचा पाठिंबा मिळाला. प्राध्यापक संघटना 'नुटा', युवक काँग्रेस, एआयएसएफ, युवा सेना, सत्यशोधक शिक्षक संघटना, किसान सभा आणि शिक्षण बचाव समिती यांनी आंदोलनात सक्रिय सहभाग घेतला. पाच तास चाललेल्या या आंदोलनादरम्यान कुलगुरू आणि कुलसचिवांमार्फत राज्यपाल, मुख्यमंत्री, शिक्षणमंत्री आणि विद्यापीठ अनुदान आयोगाच्या सचिवांना निवेदने पाठवण्यात आली. आंदोलनात 'नुटा'चे अध्यक्ष प्रा. डॉ. प्रवीण रघुवंशी, सिनेट सदस्य प्रा. डॉ. प्रशांत विघे यांच्यासह अनेक मान्यवरांनी विचार मांडले. आंदोलनाला वेगळी धार देण्यासाठी सिनेट सदस्य कैलास चव्हाण यांनी केलेली नारेबाजी आणि विद्याराज पोरे यांनी सादर केलेले पथनाट्य विशेष आकर्षणाचे ठरले. पथनाट्यातून नोकरी मिळवण्यापासून ते कायम होण्यापर्यंतच्या संघर्षमय प्रवासाचे चित्रण करण्यात आले. डॉ. पंकज नंदेश्वर, डॉ. सुमीत वाघमारे यांच्यासह अनेक तरुण प्राध्यापक या आंदोलनात सहभागी झाले होते.