शिक्षण सचिवांच्या नावे बनावट अध्यादेश काढून 50 कला शिक्षकांना वेतनवाढ:शिक्षण विभागात ओळख असल्याचे सांगत चांदणेने घेतले 17 लाख

शिक्षण विभागाच्या सचिवांच्या नावाने बनावट अध्यादेश काढून पुणे जिल्हा शिक्षण मंडळातील विविध माध्यमिक शाळांमधील ५० अपदवीधर कला शिक्षकांना पदवीधर वेतनश्रेणीचा लाभ मिळवून देण्याचा धक्कादायक प्रकार उघडकीस आला आहे. याप्रकरणी लाचलुचपत प्रतिबंधक विभागाकडून आराेपींवर गुन्हा दाखल करण्यात आला. याप्रकरणी पुस्तक प्रकाशक डाॅ. दीपक चांदणे यांच्याविरुद्ध बंडगार्डन पोलिस ठाण्यात गुन्हा दाखल करण्यात आला असून याबाबत लाचलुचपत प्रतिबंधक विभागाचे (एसीबी) पोलिस निरीक्षक अमाेल भोसले यांनी फिर्याद दिली आहे. शिक्षण विभागाचे सचिव प्रवीण मुंढे यांच्या नावाचा बनावट अध्यादेश काढण्यात आलेला असल्याचे उघडकीस आल्यावर या प्रकरणाची गंभीर दखल घेण्यात आली. या प्रकरणामध्ये डॉ. चांदणे याच्याबरोबरच अनेक जण सहभागी असण्याचा संशय पोलिसांनी व्यक्त केला आहे. त्या दृष्टीने तपास करण्यात येत आहे. पुणे जिल्हा परिषदेच्या माध्यमिक शिक्षणाधिकारी डॉ. भाऊसाहेब कारेकर यांना पैसे द्यायचे आहेत, असे सांगून डाॅ. चांदणे यांनी शिक्षकांकडून १७ लाख रुपये गोळा केल्याचे प्राथमिक चौकशीत उघडकीस आले आहे. हा प्रकार पुणे जिल्हा शिक्षण मंडळाच्या कार्यालयात १९ ऑक्टोबर २०२४ ते २७ डिसेंबर २०२४ दरम्यान घडला. त्याबाबत तक्रार मिळाल्यानंतर ‘एसीबी‘ने तपास केला. त्यानंतर या प्रकरणात गुन्हा दाखल करण्यात आला. अतिरिक्त सचिव प्रवीण मुंढेंच्या डिजिटल स्वाक्षरीचा वापर करून जीआर एसीबीतील अधिकाऱ्यांनी दिलेल्या माहितीनुसार, पुणे जिल्हा शिक्षण मंडळाच्या विविध माध्यमिक शाळांमधील ‘एटीडी’ पदविका मिळवलेल्या अपदवीधर कला शिक्षकांनी ‘एएम’ ही पदवी मिळवल्यानंतर वरिष्ठ पदवीधर वेतनश्रेणी लागू करण्याबाबतचा प्रस्ताव राज्य शासनाकडे दाखल करण्यात आला होता. डॉ. दीपक चांदणे यांनी आपली शिक्षण विभागामध्ये ओळख असल्याचे भासवले. त्यांनी शासनाकडून आर्थिक लाभ मिळवून देण्याच्या हेतूने अन्य आरोपींच्या मदतीने शालेय शिक्षण आणि क्रीडा विभाग यांचे अतिरिक्त सचिव प्रवीण मुंढे यांच्या डिजिटल स्वाक्षरीचा वापर करून बनावट शासन निर्णय तयार केला. या बनावट शासन निर्णयाचा संदर्भ टाकून शिक्षणाधिकारी यांच्या बनावट सह्यांचा बनावट आदेश तयार केला. त्यासाठी डॉ. दीपक चांदणे याने शिक्षकांकडून एकूण १७ लाख रुपये गोळा केल्याचे उघडकीस आले. बनावट जीआरही तयार केला बनावट शासन निर्णय समाज माध्यमात प्रसारित झाला. शिक्षणाधिकारी डॉ. भाऊसाहेब कारेकर यांच्या निदर्शनास ही बाब आली. त्याची छाननी करण्यात आल्यानंतर संबंधित शासन निर्णय राज्य शासनाच्या अधिकृत संकेतस्थळावर कोठेही आढळून आलेला नाही. अतिरिक्त सचिव प्रवीण मुंढे यांच्या बनावट स्वाक्षरीने हा खोटा आदेश काढण्यात आल्याची बाबही समोर आली. त्यानंतर डाॅ. भाऊसाहेब कारेकर यांनी लाचलुचपत प्रतिबंधक विभागाकडे गेल्या महिन्यात तक्रार केली होती. लाचलुचपत प्रतिबंधक विभागाने या शिक्षकांशी, मुख्याध्यापकांकडे चौकशी केली असता प्रकार उघडकीस आला. अनेकांची चौकशी शक्य हे प्रकरण उघडकीस आल्यानंतर पुण्यासह एकूणच शैक्षणिक क्षेत्रात खळबळ उडाली आहे. याप्रकरणात आता अनेकांची चौकशी होऊ शकते, असेही सांगण्यात येत आहे. ज्या शिक्षकांनी वेतनवाढ मिळवली ते देखील आता रडावर येण्याची शक्यता वर्तवण्यात येत आहे. गेल्या काही वर्षांत असे काही प्रकार झाले आहेत का? याचाही आता तपास होण्याची शक्यता निर्माण झाली आहे. तसेच डॉ. चांदणे याने याआधी कुणाला असा लाभ मिळवून दिला का ? याचाही एसीबी तपास करू शकते, असेही सांगण्यात येत आहे. याबाबत आता शासनस्तरावरही कारवाईची शक्यता आहे.