शेर्पे येथील तरुणाचा नापणे धबधब्यात बुडून मृत्यू

वैभववाडी ः मित्रांसोबत नापणे धबधबा येथे फिरण्यासाठी गेलेल्या तरुणाचा पाण्यात बुडून मृत्यू झाला आहे. विक्रम विठोबा नमसे (वय 30, रा. शेर्पे भट्टवाडी) असे या तरुणाचे नाव आहे. ही घटना शनिवारी दुपारी 2 वाजण्याच्या सुमारास घडली.

मयत विक्रम नमसे हा आपल्या दोन मित्रांसह गोठणे नदीवरील नापणे येथील धबधब्यावर फिरायला गेला होता. तिथे गेल्यानंतर त्याला पाण्यात आंघोळ करण्याचा मोह झाला. मित्रांसमवेत तो धबधब्याच्या वरच्या बाजूला आंघोळीसाठी पाण्यात उतरला. मात्र त्याला पाण्याचा अंदाज न आल्यामुळे तो पाण्यात बुडाला. त्याला पोहताही येत नव्हते. त्याच्या मित्रांनी त्याला वाचवण्याचा प्रयत्न केला. मात्र तोपर्यंत तो मयत झाला. विक्रम आपल्या आई-वडिलांसमवेत शेर्पे येथे राहात होता. आई-वडील आजारी असतात. तो मोलमजुरी करून कुटुंबाचा उदरनिर्वाह करीत होता. तर त्याचा एक भाऊ कामानिमित्त मुंबई येथे राहतो.

घटनेची माहिती मिळताच वैभववाडी पोलिस ठाण्याचे सहायक पोलिस निरीक्षक सुनील अवसरमोल यांनी पोलिस कर्मचारी बिलपे, उद्धव साबळे, महिला पोलिस श्रीमती पाटील यांच्यासह घटनास्थळी भेट देऊन पंचनामा केला. ग्रामीण रुग्णालय वैभववाडी येथे शवविच्छेदन करून मृतदेह नातेवाईकांच्या ताब्यात देण्यात आला.