सोलापूरकरांनी दिला भांडारकर संस्थेच्या विश्वस्तपदाचा राजीनामा:संतप्त आंदोलकांच्या मागणीला यश, छत्रपती शिवाजी महाराजांवरील वादग्रस्त विधान भोवले

अभिनेता राहुल सोलापूरकर यांनी छत्रपती शिवाजी महाराज यांच्याबद्दल केलेल्या वादग्रस्त वक्तव्यानंतर शिवप्रेमी तसेच विविध राजकीय पक्षांनी याचा तीव्र निषेध केला. उदयनराजे भोसले यांनी देखील कडक शब्दात राहुल सोलापूरकर यांच्या त्या विधानाचा समाचार घेतला आहे. ही सगळी एकूण परिस्थिती पाहता राहुल सोलापूरकर ज्या भांडारकर संस्थेत विश्वस्तपदावर होते त्याचा राजीनामा संस्थेने मागितला होता. त्यानुसार राहुल सोलापूरकर यांनी विश्वस्तपदाचा राजीनामा दिला असल्याची माहिती समोर आली आहे. राहुल सोलापूरकर यांच्या विरोधात अनेक संघटना तसेच राजकीय पक्षांनी आक्रमक भूमिका घेत भांडारकर संस्थेच्या बाहेर निदर्शने केली. तसेच आंदोलकांनी संस्थेच्या अधिकाऱ्यांकडे राहुल सोलापूरकर यांच्या हकालपट्टीची मागणी केली होती. सुरुवातीला संस्थेकडून वरिष्ठ अधिकाऱ्यांनी प्रतिसाद दिला नव्हता. त्यामुळे आंदोलन आणखी आक्रमक झाले होते. जोपर्यंत राहुल सोलापूरकर यांचा राजीनामा घेतला जात नाही, तोपर्यंत आंदोलन सुरूच राहील, अशी भूमिका आंदोलकांनी घेतली होती. यावेळी आंदोलकांनी संस्थेच्या भूमिकेवर देखील प्रश्नचिन्ह उपस्थित केले होते. संस्थेने स्पष्ट करावे की, राहुल सोलापूरकर यांच्या विधानाशी ते सहमत आहेत का?, जर सहमत नसेल, तर त्यांचा तातडीने राजीनामा घेण्यात यावा, अशी मागणी संतप्त आंदोलकांनी केली. यावेळी पोलिसांचा देखील मोठा बंदोबस्त करण्यात आला होता. अखेर आंदोलकांच्या मागणीला यश आले आणि राहुल सोलापूरकर यांनी भांडारकर संस्थेच्या विश्वस्त पदाचा राजीनामा दिला व संस्थेने देखील तो स्वीकारला आहे. राहुल सोलापूरकर काय म्हणाले होते? राहुल सोलापूरकर यांनी एका मुलाखतीत बोलताना छत्रपती शिवाजी महाराज यांच्या आग्रा येथून सुटकेविषय भाष्य केले होते. ते म्हणाले होते, छत्रपती शिवाजी महाराज लाच देऊन आग्र्यातून सुटले होते. परंतु, पेटारे-बिटारे असे काहीच नव्हते. छत्रपती शिवाजी महाराज चक्क लाच देऊन आग्र्यातून सुटून महाराष्ट्रात आले होते, असे वादग्रस्त विधान त्यांनी केले होते. याच विधानामुळे महाराष्ट्रातील शिवप्रेमी तसेच विविध राजकीय पक्षांनी तीव्र निषेध करण्यास सुरुवात केली.