स्थानिक पातळीवर रोजगार निर्मितीस प्राधान्य देणार:बडनेरा मतदार संघातील उमेदवार तुषार भारतीय यांचा संकल्प

बडनेरा मतदारसंघात चार अभियांत्रिकी महाविद्यालये असून, दरवर्षी या महाविद्यालयांमधून शेकडो पदवीधर विद्यार्थी बाहेर पडतात. रोजगारासाठी त्यांना स्थानिक पातळीवर रोजगाराच्या संधी उपलब्ध नसल्याने मुंबई, पुणे, बंगळुरु व अन्य ठिकाणी जावे लागते. याचा थेट परिणाम कूटंबांवर पडत असून, बडनेरा हा वृद्धांचा मतदारसंघ अशी ओळख होऊ नये, यासाठी स्थानिक पातळीवर रोजगार निर्मितीचा संकल्प अपक्ष उमेदवार तुषार भारतीय यांनी व्यक्त केला. बडनेरा विधानसभा मतदारसंघाचे अपक्ष उमेदवार तुषार भारतीय यांची पदयात्रा राजापेठ, संताजी नगर, एकनाथविहार, एकनाथपुरम, पवन नगर, इरा कॅालनी, मायानगर या भागात झाली. या भागातील ज्येष्ठ नागरिकांसह महिला व तरूण तसेच विद्यार्थ्यांसोबत त्यांनी थेट संवाद साधला. या वेळी अनेक ज्येष्ठ नागरिकांसह तरूणांनी रोजगाराचा प्रश्न त्यांच्यासमोर मांडला. केवळ अभियांत्रिकी विद्यार्थ्यांसाठीच नाही तर स्पर्धा परीक्षांची तयारी करणाऱ्या विद्यार्थ्याना अभ्यासिका उपलब्ध करून देणे, औद्योगिक क्षेत्रात व्यापक रोजगारनिर्मिती उपलब्ध करण्यावर आपला भर राहणार असल्याची ग्वाहीही त्यांनी या वेळी दिली.