ریاست میں عوام تبدیلی چاہتی ہے اور وہ تبدیلی لا کر رہیں گے: شرد پوار

ستارا: نیشنلسٹ کانگریس پارٹی کے صدر شرد پوار نے ستارا میں میڈیا سے بات کرتے ہوئے کہا ہے کہ ریاست کے عوام کو تبدیلی کی ضرورت ہے اور وہ تبدیلی لاکر رہیں گے۔ انہوں نے کہا کہ عوام مہا وکاس اگھاڑی کی حمایت میں کھل کر سامنے آئیں گے۔

شرد پوار نے مزید کہا کہ گزشتہ انتخابات کی تصویر ایک ایسی تصویر تھی جو غیر متوقع طور پر سامنے آئی تھی اور رائے دہی کے دن نتائج کی سمت واضح ہوئی۔ تاہم، موجودہ صورتحال مختلف ہے۔ انہوں نے کہا کہ جو لوگ اقتدار میں ہیں انہیں لوک سبھا انتخابات میں جو دھچکا لگا، اس پر انہوں نے سنجیدگی سے غور کیا۔ عوام کو خوش کرنے کے لیے انہوں نے ایسے منصوبے متعارف کرائے جن کے ذریعے عوام کو زیادہ سے زیادہ پیسے ملے۔ لیکن یہ منصوبے کتنے دن چلیں گے، اس کا حساب انہیں دینا چاہیے تھا، لیکن نہیں دیا۔ انہوں نے مثال دیتے ہوئے کہا کہ ’لاڈکی بہین‘ اسکیم کے لیے 2 کروڑ خواتین کو 1500 روپے دیے گئے، جس سے خواتین خوش ہوئیں، لیکن اس کا کوئی خاص اثر نہیں ہوگا۔

شرد پوار نے کہا کہ ایک طرف حکومت نے مدد فراہم کی، مگر دوسری طرف خواتین کے خلاف زیادتیوں میں اضافہ ہوا ہے۔ انہوں نے بتایا کہ گزشتہ 2 سال میں 67 ہزار خواتین کے ساتھ زیادتی ہوئی اور 64 ہزار خواتین و لڑکیاں ریاست بھر میں لاپتہ ہیں۔ شرد پوار نے کہا کہ اگر ایک طرف ’لاڈکی بہین‘ کا نعرہ لگایا جارہا ہے، تو دوسری طرف خواتین کے ساتھ زیادتی اور گمشدگی کی صورتحال میں کسی بھی حکومتی قدم کا کوئی خاطر خواہ اثر نہیں نظر آتا۔

شرد پوار نے کسانوں کے مسائل پر بھی روشنی ڈالی اور کہا کہ فصلیں ہاتھ سے جا رہی ہیں اور کچھ علاقوں میں سویا بین اور کپاس کے دام زیادہ ہونے کی وجہ سے کسان پریشان ہیں اور خود کشیوں کا شکار ہو رہے ہیں۔ ساتھ ہی انہوں نے تعلیم کے شعبے کا بھی ذکر کیا اور کہا کہ تعلیمی اداروں کی تعداد میں اضافہ ہوا ہے اور لوگ پڑھ رہے ہیں، لیکن روزگار کی کمی کا مسئلہ برقرار ہے۔ نوجوانوں کے لیے روزگار کے مواقع نہیں ہیں۔

شرد پوار نے کہا کہ یہ مسائل ہمارے سامنے ہیں اور ان کا حل تلاش کرنا ہمارا کام ہے۔ دوسری طرف حکومت اپنے اختیارات کا غلط استعمال کر رہی ہے۔