پنجایتی اور شہری بلدیاتی انتخابات جلد منعقد ہوں گے: ایل جی سنہا

جموں// لیفٹیننٹ گورنر منوج سنہا نے ہفتہ کو کہا کہ جموں و کشمیر میں پنچایتی اور شہری بلدیاتی انتخابات جلد منعقد کئے جائیں گے جن کیلئے تیاریاں کی جا رہی ہیں۔
ان باتوں کا اظہار لیفٹیننٹ گورنر نے جھڑی میلہ کا دورہ کرنے اور جھڑی گاؤں میں بابا جیتو کی سمادھی پر حاضری دینے کے بعد کیا۔ انہوں نے کہا کہ بابا جیتو کی قربانی آج بھی سماج کو ایک مضبوط قوم کی تعمیر کی طرف کام کرنے کی ترغیب دیتی ہے۔
جھڑی میلہ کے میدان میں ایل جی سنہا نے کسانوں اور عقیدت مندوں کی بڑی تعداد سے خطاب کیا اور اعلان کیا کہ پنچایت اور شہری بلدیاتی انتخابات جلد منعقد کیے جائیں گے۔
لیفٹیننٹ گورنر نے جھڑی میلہ کی روحانی اور ثقافتی اہمیت پر روشنی ڈالتے ہوئے کہا کہ یہ سالانہ تہوار ہمیں اپنے کاشتکاری خاندانوں کی قربانیوں اور انسانیت کی خدمت میں ان کے اہم کردار کی یاد دلاتا ہے۔ “جھری میلہ ہندوستان کی ثقافتی یکجہتی کی علامت ہے اور سماجی اقدار میں بندھی یہ روایت ہمیں اپنی وراثت، ثقافت، فن اور دستکاری کے بارے میں سیکھنے کا موقع فراہم کرتی ہے”۔
لیفٹیننٹ گورنر نے کہا کہ وزیر اعظم نریندر مودی کی رہنمائی میں حکومت جموں و کشمیر کے زرعی شعبے کو تبدیل کرنے کے لیے پرعزم ہے۔ انہوں نے کہا، “جموں و کشمیر کے کسانوں کو بااختیار بنانا میرا مشن ہے اور ہم نے زراعت اور متعلقہ شعبوں میں تبدیلی لانے کے لیے حکمت عملی اپنائی ہے۔ ہم دیہی علاقوں کے نوجوانوں کو بھی مساوی مواقع فراہم کریں گے”۔
لیفٹیننٹ گورنر نے پی او جے کے کے بے گھر خاندانوں، مغربی پاکستانی مہاجرین، قبائلیوں، والمیکیوں اور دیگر محروم طبقات کے حقوق کے تحفظ کے اپنے عزم کا اعادہ بھی کیا۔
اس موقع پر لیفٹیننٹ گورنر نے ترقی پسند کسانوں اور جھری میلہ کے انعقاد میں شامل سرکاری افسران کو اعزازات دیے۔ انہوں نے سرکاری محکموں، زرعی کاروباریوں اور کسانوں کے ذریعے لگائے گئے اسٹالز کا بھی دورہ کیا۔ اس تقریب میں فنکاروں کی شاندار پرفارمنس نے خطے کی بھرپور ثقافت اور فن کو اجاگر کیا۔
اس تقریب میں جموں کے ڈی ڈی سی چیئرمین بھارت بھوشن، اے ڈی جی پی جموں آنند جین، ڈویژنل کمشنر جموں رمیش کمار، مرہ کے رکن اسمبلی سریندر کمار، ڈپٹی کمشنر جموں سچن کمار ویشیا، سینئر افسران اور مختلف شعبہ ہائے زندگی سے تعلق رکھنے والے افراد بھی موجود تھے۔