अंजली दमानियांचा नामदेवशास्त्रींना टोला:म्हणाल्या - तुम्ही धनंजय मुंडे यांचे डोळे पाहिले अन् आम्ही त्यांच्या दहशतीचे व्हिडिओ पुरावे पाहिले

सामाजिक कार्यकर्त्या अंजली दमानिया यांनी मंत्री धनंजय मुंडे यांना पाठिंबा देणाऱ्या भगवानगडाचे महंत नामदेवशास्त्री यांच्यावर निशाणा साधला आहे. नामदेवशास्त्री यांनी धनंजय मुंडे यांचे डोळे व अंतःकरण पाहून त्यांना पाठिंबा दिला, पण आम्ही त्यांच्या दहशतीचे पुरावे व व्हिडिओ पाहिलेत, असे त्या म्हणाल्यात. राज्याचे अन्न व नागरी पुरवठा मंत्री धनंजय मुंडे हे सध्या मस्साजोगचे सरपंच संतोष देशमुख यांच्या हत्याकांडामुळे अडचणीत सापडलेत. त्यांचे निकटवर्तीय वाल्मीक कराड यांच्यावर यासंबंधी मकोकाची कारवाई करण्यात आली आहे. त्यामुळे विरोधकांनी धनंजय यांच्या राजीनाम्याची मागणी केली आहे. या पार्श्वभूमीवर भगवान गडाचे महंत नामदेव शास्त्री यांनी बीड प्रकरणात मंत्री धनंजय मुंडे यांना पाठिंबा देऊन गडाची पर्यायाने वंजारी समाजाची ताकद भक्कमपणे त्यांच्या पाठिशी उभी केली आहे. काय म्हणाल्या अंजली दमानिया? अंजली दमानिया यांनी नामदेवशास्त्री सानप यांच्या या भूमिकेवर प्रश्नचिन्ह उपस्थित करत त्यांच्यावर हल्ला चढवला आहे. त्या शनिवारी म्हणाल्या, नामदेवशास्त्री यांनी काल माध्यमांना दिलेली मुलाखत ऐकून वाईट वाटले. ते म्हणाले, मी धनंजय मुंडे यांचे डोळे पाहिलेत, अंतःकरण पाहिले आणि भगवान गडाकडून धनंजय मुंडे यांना पाठिंबा जाहीर केला. पण आम्ही त्यांचे पुरावे पाहिले, त्यांची बॅलेन्स शीट पाहिली आणि केलेल्या दहशतीचे पुरावे पाहिले बंदुकांचे फोटो पाहिले, व्हिडिओ पाहिले. मी या प्रकरणी पोलिस अधीक्षक, एडीजी, डीजी, मुख्यमंत्री, राष्ट्रवादी काँग्रेसचे अध्यक्ष अजित पवार यांना भेटले आणि मुंबई हायकोर्टाच्या मुख्य न्यायाधीशांना पुरावे सादर केले. दिवंगत संतोष देशमुख यांचे भाऊ धनंजय देशमुख आपल्याला (नामदेवशास्त्री) उद्या भेटण्यासाठी येणार आहेत. त्यांच्याबरोबर मी हे पुरावे पाठवणार आहे. कृपया ते पहावे ही विनंती आणि... वैभवी व तिच्या छोट्या भावाच्या डोळ्यातील व अंतःकरणातील दुःख देखील पाहावे ही नम्र विनंती, असे दमानिया यांनी शास्त्री यांना टोला हाणताना म्हटले आहे. आता पाहू काय म्हणाले होते नामदेवशास्त्री? नामदेवशास्त्री धनंजय मुंडे यांना पाठिंबा देत म्हणाले होते की, धनंजय मुंडे भगवान गडावर आल्यानंतर मी त्यांची मानसिकता जाणून घेतली. धनंजय यांची गुन्हेगारी पार्श्वभूमीवर नाही. त्यांना जाणिवपूर्वक गुन्हेगार ठरवले जात आहे. धनंजय मुंडे हा खंडणीवर जगणारा माणूस नाही. त्यांच्यावर आरोप होणे हे संप्रदयाचे नुकसान आहे. ज्यांनी गुन्हा केला त्यांची मानसिकता तशी का झाली, याची मीडिया दखल का घेत नाही? धनंजय मुंडे यांच्याबाबतीत मीडिया ट्रायल सुरू आहे. राजकीय स्वार्थासाठी जातीय तेढ या निमित्ताने निर्माण होत आहे. धनंजय मुंडे हे गुन्हेगार नाहीत याची जाणिव त्यांच्या पक्षाच्या नेत्यांनाही आहे. हे ही वाचा... नामदेवशास्त्रींनी राजकारणात न पडण्याचा पायंडा मोडला का?:पंकजा मुंडेंसोबतच्या वादात गडावर राजकारण न करण्याची घेतली होती भूमिका बीड - भगवान गडाचे महंत नामदेव शास्त्री यांनी बीड प्रकरणात मंत्री धनंजय मुंडे यांना पाठिंबा देऊन गडाची पर्यायाने वंजारी समाजाची ताकद भक्कमपणे त्यांच्या पाठिशी उभी केली आहे. शास्त्रींनी पंकजा मुंडे यांच्यासोबतच्या कथित वादात गडावरून राजकारण न करण्याची भूमिका घेतली होती. पण आता त्यांनीच धनंजय यांना पाठिंबा दिल्यामुळे त्यांनी राजकीय वादात न पडण्याचा आपला पायंडा मोडला का? असा प्रश्न उपस्थित केला जात आहे. वाचा सविस्तर