हिंगोली जिल्हा महसूल सांस्कृतिक स्पर्धा:एकपात्री नाट्याद्वारे शेतकऱ्यांची मांडली व्यथा, जिल्हाधिकारी गाण्याला रसिकांचा वन्स मोर

हिंगोली जिल्हा महसूल विभागाच्या सांस्कृतिक स्पर्धेत शुक्रवारी ता. ३१ एकपात्री नाटकाद्वारे शेतकऱ्यांची व्यथा मांडण्यात आली. शेतामालास भाव नाही, मुलांना नोकरी नाही अन शेतकऱ्यांच्या मुलांना मुली देत नाही असे अनेक प्रश्‍न मांडण्यात आले. जिल्हाधिकारी अभिनव गोयल यांनी सादर केलेल्या एक प्यार का नगमा है या गाण्याला रसिकांचा वन्स मोर मिळाला. हिंगोली येथील शिवाजीराव देशमुख सभागृहात आयोजित स्पर्धेचे उदघाटन जिल्हाधिकारी गोयल यांच्या हस्ते झाले. यावेळी निवासी उपजिल्हाधिकारी अभिमन्यू बोधवड, उपजिल्हाधिकारी अनिल माचेवाड, मंजुषा मुथा, विकास माने, प्रतिक्षा भुते, तहसीलदार श्रीकांत भुजबळ, जीवककुमार कांबळे, हरीश गाडे, सखाराम मांडवगडे, शारदा दळवी यांची प्रमुख उपस्थिती होती. यावेळी जिल्हाधिकारी कार्यालय व जिल्ह्यातील सर्व तहसील कार्यालयातील कर्मचाऱ्यांनी या सांस्कृतिक स्पर्धेमध्ये भाग घेऊन आपली कला सादर केली. याप्रसंगी जिल्हाधिकारी अभिनव गोयल यांनी एक प्यार का नगमा है हे गीत गात उपस्थित रसिकांचा वन्स मोर मिळवला. या सांस्कृतिक स्पर्धेत समूह गायन प्रकारात कळमनुरीचा स्मिता सुर्यवंशी व संघाने प्रथम क्रमांक मिळविला. एकपात्री कला प्रकारात वसमतच्या माधव वाडीकर यांनी शेतकऱ्यांची व्यथा मांडली. वैयक्तिक गीत गायनामध्ये विनोद डोणगावकर व नकुल वाघुंडे यांनी प्रथम, आम्रपाली चोरमारे द्वितीय, स्मिता सुर्यवंशी यांना तृतीय क्रमांक मिळविला. समुह नृत्यामध्ये सुधाकर सराटे व संघाने प्रथम, माधव वाडीकर व संघाने द्वितीय क्रमांक मिळविला. युगल गीत गायनामध्ये प्रल्हाद गोटे व आम्रपाली चौरमारे यांना प्रथम क्रमांक, मृदंग वादन मध्ये दत्ता वालेकर यांनी प्रथम क्रमांक, अभंग गायनामध्ये शिल्पा सरकटे यांनी प्रथम क्रमांक मिळविला. नाटिकेमध्ये शिरीष आसेगावकर प्रथम, वैयक्तीक नृत्यामध्ये मारोती सिरसाट व शंभू दुभळकर यांनी प्रथम, हार्मोनियम वादनामध्ये संदीप डोंगरे प्रथम तर लावणीमध्ये व्यंकटी मनुरकर यांनी प्रथम क्रमांक मिळविला आहे. या स्पर्धकांची जालना येथे ता. १४ ते ता. १६ फेब्रुवारी रोजी होमाऱ्या विभागीय स्पर्धेसाठी निवड झाली. यावेळी यावेळी परीक्षक म्हणून शिल्पा नरसीकर व मंगेश पांडे यांनी काम पाहिले.