एमपीएससी परीक्षेत मोठा घोटाळा उघड:40 लाखांत पेपर देण्याचे आमिष, 3 आरोपी ताब्यात; मुख्य सूत्रधार वेगळा असण्याची शक्यता

पुणे पोलिसांनी एमपीएससी परीक्षेच्या प्रश्नपत्रिका विक्रीच्या प्रकरणात मोठी कारवाई केली आहे. महाराष्ट्र लोकसेवा आयोगाच्या गट-ब (अराजपत्रित) संयुक्त पूर्व परीक्षेपूर्वी प्रश्नपत्रिका आणि उत्तरपत्रिका ४० लाख रुपयांत देण्याचे आमिष दाखवणाऱ्या तीन आरोपींना अटक करण्यात आली आहे. गुन्हे शाखेचे उपायुक्त निखिल पिंगळे यांच्या नेतृत्वाखाली केलेल्या कारवाईत दिपक दयाराम गायधने (२६, चाकण), सुमित कैलास जाधव (२३, चाकण) आणि योगेश सुरेंद्र वाघमारे (भंडारा) यांना ताब्यात घेण्यात आले. गायधने आणि जाधव हे म्हाळुंगे एमआयडीसीत टेक्निशिअन म्हणून कार्यरत असून, वाघमारे हा आयटीआय उत्तीर्ण आहे. तपासात आरोपींकडून नाशिक येथील २४ उमेदवारांची यादी जप्त करण्यात आली आहे. या यादीतील उमेदवार यंदाच्या परीक्षेला बसणार आहेत का, याचा तपास सुरू आहे. विशेष म्हणजे आरोपींपैकी एकही पदवीधर नसल्याने त्यांना एमपीएससी परीक्षेचा कोणताही अनुभव नाही, त्यामुळे मुख्य सूत्रधार वेगळाच असल्याची शक्यता पोलिसांनी वर्तवली आहे. पोलीस आयुक्त अमितेश कुमार यांच्या मार्गदर्शनाखाली सुरू असलेल्या तपासात अद्याप पेपर फुटल्याचे निष्पन्न झालेले नाही. खासगी क्लास चालकांकडून परीक्षार्थींची यादी मिळवली गेली का, याचाही तपास सुरू आहे. आरोपींविरुद्ध बंडगार्डन पोलीस ठाण्यात परीक्षा प्रक्रियेत अडथळा आणणे आणि फसवणुकीचा प्रयत्न केल्याप्रकरणी गुन्हा दाखल करण्यात आला आहे.