चुलीत गेली दारू अन् मटण, मी दाबेल आता निवडणुकीत मतदान यंत्राचं बटण!, अमरावतीच्या ग्रामीण भागात स्वीप कक्षाच्या पथनाट्याची धमाल; पाहण्यासाठी नागरिकांची गर्दी

अमरावती तालुका स्विप कक्षाच्यावतीने तयार करण्यात आलेल्या " चुलीत गेली दारू अन चुलीत गेलं मटण, मी दाबेल निवडणुकीत मतदानाचं बटण " या पथनाट्याने ग्रामीण भागात धमाल उडविली आहे. दरम्यान हे पथनाट्य पाहण्या व ऐकण्यासाठी ग्रामीण भागात चांगलीच गर्दी उसळत आहे. मतदानाचा टक्का वाढवण्यासाठी स्विप कक्षा अंतर्गत जिल्ह्यात विविध उपक्रम राबविले जात असून अमरावती तालुक्याच्या चमूने हे पथनाट्य तयार केले आहे. "चुलीत गेली दारू अन चुलीत गेलं मटण, मी दाबेल निवडणुकीत मतदानाचं बटण" हे मुळात ग्रामीण भागातील वऱ्हाडी भाषेतील वाक्य आहे. या पथनाट्याने गावागावातील चौका-चौकात धमाल उडविली आहे. स्वीपप कक्षाच्या नोडल अधिकारी तथा जिल्हा परिषदेच्या मुख्य कार्यकारी अधिकारी संजीता महापात्र, शिक्षणाधिकारी बुद्धभूषण सोनोने यांच्या मार्गदर्शनाखाली जिल्ह्यातील विविध विधानसभा मतदार संघात हे पथनाट्य सादर केले जात आहे. अमरावती पंचायत समितीचे गटविकास अधिकारी सुदर्शन तुपे, तालुका नोडल अधिकारी तथा गटशिक्षणाधिकारी धनंजय वानखडे यांच्या प्रमुख उपस्थितीत मतदार जनजागृती संदर्भात रेवसा, कठोरा व नया अकोला येथे या पथनाट्याचे सादरीकरण करण्यात आले.शिक्षण विस्तार अधिकारी सुधीर खोडे यांच्या प्रमुख मार्गदर्शनात वैशाली वऱ्हाडे, नलिनी गोरे, कविता उघडे, अश्विनी पोकळे, सारीका काळे, संगीता रूपनारायण, सचिन वानखडे यांनी पथनाट्याचे उत्कृष्ट सादरीकरण केले.