छत्रपती शिवाजी महाराजांच्या अपमानाचा बदला:सोलापुरकरांच्या प्रतिमेला काळा फासून प्रहारचे आक्रमक आंदोलन, तात्काळ अटकेची मागणी

अमरावतीत छत्रपती शिवाजी महाराजांबद्दल वादग्रस्त विधान करणाऱ्या अभिनेते राहुल सोलापुरकर यांच्याविरोधात प्रहार संघटनेने आज तीव्र आंदोलन केले. प्रहारचे महानगर प्रमुख बंटी रामटेके यांच्या नेतृत्वात जिल्हाधिकारी कार्यालयासमोर झालेल्या या आंदोलनात कार्यकर्त्यांनी सोलापुरकर यांच्या प्रतिमेला काळा रंग फासून आपला संताप व्यक्त केला. सोलापुरकर यांनी नुकत्याच एका कार्यक्रमात छत्रपती शिवाजी महाराजांनी लाच देऊन आग्र्याहून सुटका करून घेतली, असे वादग्रस्त विधान केले होते. या विधानामुळे संतप्त झालेल्या प्रहार संघटनेच्या पदाधिकाऱ्यांनी जिल्हाधिकाऱ्यांना निवेदन देऊन सोलापुरकर यांच्या तात्काळ अटकेची मागणी केली आहे. प्रहारच्या पदाधिकाऱ्यांच्या मते, सोलापुरकर यांचे विधान तथ्यहीन आणि निंदनीय असून त्यामुळे कायदा व सुव्यवस्थेचा प्रश्न निर्माण होऊ शकतो. या आंदोलनात प्रहारचे प्रदेश प्रवक्ते जीतूभाऊ देशमुख, जिल्हाध्यक्ष अभिजीत देशमुख, संपर्कप्रमुख गोलूभाऊ पाटील, संघटक श्यामभाऊ इंगळे, प्रदेश सचिव नंदकिशोर कुयटे यांच्यासह अनेक पदाधिकारी व कार्यकर्ते सहभागी झाले होते.