जयंत पाटील कपटी अन् नीच माणूस:आम्ही त्यांचा टप्प्यात आणून कार्यक्रम करतोय, गोपीचंद पडळकर यांच्या वक्तव्याने चर्चांना उधाण

जयंत पाटील हे टप्प्यात आणून काम करत असतात, पण त्यांचा टप्प्यात आणून आम्ही कार्यक्रम करत आहे, असे भाजपचे नेते गोपीचंद पडळकर यांनी म्हटले आहे. पडळकर यांच्या वक्तव्याची चर्चा होण्याचे कारणही तसेच आहे, राजकीय वर्तुळात शरद पवार गटाचे प्रदेशाध्यक्ष जयंत पाटील हे भाजपच्या संपर्कात असल्याची चर्चा सुरू झाली आहे. त्यामुळे येणाऱ्या काही दिवसांमध्ये राष्ट्रवादी शरद पवार गटाला धक्का बसणार का हे पाहणं महत्त्वाचे ठरणार आहे. दरम्यान गोपीचंद पडळकर पुढे बोलताना म्हणाले की, जयंत पाटील कपटी आणि नीच माणूस म्हणून ते कधी समाधानी नसतात. मी जत मतदारसंघातून निवडून येऊ नये यासाठी त्यांनी खूप प्रयत्न केले पण जतच्या लोकांना कळतंय कोणाला घरी घालवायचे. तुम्ही सांगायची गरज नाही, असे त्यांनी कवठेमहांकाळमध्ये बहुजन समाजातर्फे आयोजित सत्कार सोहळ्यात बोलताना म्हटले आहे. विधान परिषदेवेळी माझा अर्जबाद करा म्हणाले गोपीचंद पडळकर म्हणाले की, मी विधान परिषदेचा आमदार झालो त्यावेळी मला विरोध केला. निवडणुकीच्या वेळी राष्ट्रवादीच्या आमदारांनी मला विरोध करत आक्षेप घेतला. तुम्ही खोटी माहिती दिली आहे अर्ज बाद करा, असे जयंत पाटील यांनी सांगितले. जयंत पाटील भाजपच्या संपर्कात असल्याची चर्चा भाजपचे ज्येष्ठ नेते तथा केंद्रीय मंत्री नितीन गडकरी पुढील आठवड्यात सांगलीच्या दौऱ्यावर येणार आहेत. या दौऱ्यात ते राजारामबापू शिक्षण व उद्योग समूहाला भेट देणार आहेत. यामुळे राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांच्या भाजप प्रवेशाची चर्चा पुन्हा एकदा राज्याच्या राजकारणात रंगली आहे. उपमुख्यमंत्री अजित पवार यांच्या बंडानंतर शरद पवारांचे 40 आमदार त्यांच्यासोबत गेले होते. तेव्हापासून ते सातत्याने शरद पवारांना झटके देत आहेत. विशेषतः शरद पवार गटाचे प्रदेशाध्यक्ष जयंत पाटीलही त्यांच्या पक्षात जाण्याची चर्चा सुरू आहे. पण आता पाटील हे राष्ट्रवादीच्या नव्हे तर भाजपच्या संपर्कात असल्याचा दावा केला जात आहे. केंद्रीय मंत्री नितीन गडकरी येत्या 17 तारखेला सांगलीच्या दौऱ्यावर जाणार आहेत. या दौऱ्यात ते इस्लामपूर येथील राजारामबापू शिक्षण व उद्योग समूहाला भेट देणार आहेत. तसेच कासेगाव शिक्षण संस्थेच्या अभियांत्रिकी महाविद्यालयाच्या एका अद्ययावत इमारतीचे उद्घाटन करणार आहेत. वाचा सविस्तर