जर का पैसे घेत असतील, तर तुमची खैर नाही:विहीरीमागे 75 हजारांची मागणी करणाऱ्या भावकीला अजित पवारांचा सज्जड दम

राज्याचे उपमुख्यमंत्री अजित पवार आपल्या परखड आणि स्पष्ट स्वभावासाठी ओळखले जातात. त्यांच्या या स्वभावाचा अनुभव बारामतीकरांनी अनेकदा घेतला आहे. आज देखील बारामतीकरांनी हा अनुभव घेतला. तालुक्यातील नागरिकांच्या विहिरींच्या मंजुरीसाठी 75 हजार रुपये घेतले जात असल्याची तक्रार अजित पवारांकडे काहींनी केली होती. सुजय पवार यांच्याकडून पैसे मागितले जात असल्याचे त्यांना सांगण्यात आले. ते पैसे घेत असतील तर त्यांचे काही खरें नाही, असा सज्जड इशारा उपमुख्यमंत्री पवार यांनी भर सभेत स्टेजवरुन दिला. उपमुख्यमंत्री अजित पवार आज बारामती दौऱ्यावर होते. बारामतीतील पंचायत समितीच्या जवळच्या इमारतीतील एका बँक शाखेच्या उद्घाटन त्यांच्या उपस्थितीत झाले. याप्रसंगी भाषणात बोलताना अजित पवार यांनी आपल्या भावकीला उपरोक्त इशारा दिला. शिवाय बारामतीमध्ये होणाऱ्या विविध विकासकामांसंबंधी त्यांनी माहिती दिली. नेमके काय म्हणाले अजित पवार? बर्हाणपुर येथे एकाने मला निवेदन दिले की, सुजय पवार कोण आहे का? पंचायत समितीकडून शेतकऱ्यांना मोफत विहीर देण्याची योजना आहे. मात्र या कामात आमची एक भावकीच पैसे मागत असल्याची तक्रार माझ्याकडे आली आहे. एका विहिरीमागे 75 हजार रुपयांची मागणी होत आहे.याबाबत ‘बीडीओं’नी नोंद घेण्याची सुचना यावेळी पवार यांनी केली. ते पुढे म्हणाले की, मी एकच बाजू बघत नाही. याबाबत शहानिशा करावी लागेल. जर का पैसे घेत असतील तर त्याचे काय खरे नाही, अशा शब्दांत पवार यांनी कारवाईचा इशारा दिला. तसेच घेत नसतील तर चांगल्या कामासाठी शुभेच्छा आहेत, असे अजित पवार म्हणाले. पुरंदर विमानतळाविषयी दिली माहिती अजित पवार यांनी यावेळी पुणे जिल्ह्यातील दुसऱ्या विमानतळाबाबतही माहिती दिली. पुरंदरचे विमानतळ जिथे नागरी उड्डाण खात्याने ठरवले आहे तिथेच होईल, काही लोकांची नाराजी घ्यावी लागली तरीही ते तिथेच होईल, असे ते म्हणाले. बँक मॅनेजरची घेतली फिरकी बँकेच्या उद्घाटनानंतर बॅंक अधिकाऱ्यांची ओळख करुन घेताना पवार यांना संबंधित बॅंक मॅनेजरने पानसदृश्य काहीतरी खाल्ल्याचे लक्षात आले. यावरून त्यांनी बँक मॅनेजरची फिरकी घेतली. आप पान खाते है क्या? असा सवाल पवारांनी मॅनेजरला केला. अधिकाऱ्याने नकार दर्शविताच ‘आप मुझे बेवकुफ समजते हो क्या? असे म्हणत व्यसनाने कॅन्सर होतो, असे मॅनेजरला सांगितले.