महाकुंभ चेंगराचेंगरीबाबत सरकारची लपवाछपवी? भंडाफोड करणाऱ्या टीव्ही 9 च्या रिपोर्टरला धक्काबुक्की

प्रयागराज येथे सुरू असलेल्या महाकुंभमेळ्यात अमृतस्नानाच्या पर्वणीदरम्यान चेंगराचेंगरीची दुर्घटना घडली होती. या दुर्घटनेबाबत सरकारकडून कोणतीही माहिती देण्यात येत नव्हती. अखेर घटनेच्या 20 तासानंतर प्रशासानाने मृतांची आकडेवारी जारी करत 30 जणांचा मृत्यू आणि 60 जण जखमी झाल्याचे सांगितले. त्यानंतर मृतांचा आकडा 49 पर्यंत वाढल्याचे सांगण्यात आले. मात्र, प्रत्यक्षात मृतांची आणि जखमींची संख्या जास्त असल्याचे सांगण्यात येत आहे. या ढिसाळ नियोजनाबाबत उत्तर प्रदेशचे मुख्यमंत्री योगी आदित्यनाथ यांची राजीनामा देण्याची मागणी साधूसंतांनीही केली आहे.

या दरम्यान, याबाबत वार्तांकन करण्यासाठी गेलेल्या टीव्ही 9च्या रिपोर्टरला प्रयागराज येथील वैद्याकीय महाविद्यालयात धक्काबुक्की झाल्याची घटना घडली आहे. या घटनेचा व्हिडीओ शुक्रवार संध्याकाळपासून व्हायरल होत आहे. त्यामुळे सरकार महाकुंभ येथील चेंगराचेंगरीची दुर्घटना आणि मृतांच्या आकड्याबाबत लपवाछपवी करत असल्याचा संशय व्यक्त होत आहे.

या घटनेतील मृतांचा आकडा नेमका किती आहे. तसेच अनेकजण आपल्या नातेवाईकांचा शोध घेत आहेत. त्यांना मदत करण्यासाठी टीव्ही 9 चे रिपोर्टर विनीत चौबे प्रयागराज येथील वैद्याकीय महाविद्यालयात मृतदेह ठेवलेल्या ठिकाणी गेले होते. तेथील मृतांची यादी आणि तपशील तपासत असताना तेथील अधिकाऱ्यांनी त्यांना बाहेर काढण्याचा प्रयत्न केला. तसेच अटक करण्याची धमकी दिली. रिपोर्टरने आपले आय कार्ड दाखावत माहिती घेण्यासाठी आल्याचे सांगितले. त्यानंतर तेथील सुरक्षा रक्षकांनी त्यांना धक्काबुक्की करत आवाराबाहेर जाण्यास सांगितले. रिपोर्टरने त्यांच्याकडे आयकार्ड आणि त्यांची ओळख विचारली. त्यावर त्यांनी काहीही माहिती देण्यास नकार दिला. या घटनेतून महाकुंभमधील चेंगराचेंगरीची दुर्घटना मृतांचा आकडा आणि बेपत्ता झालेल्यांबाबत सरकार काहीतरी लपवाछपवी करत आहे, असा संशय निर्माण होत आहे.

यावेळी रिपोर्टरने तेथे उपस्थित असलेल्यांशी संवाद साधला. अनेकजणांचे नातेवाईक बेपत्ता असून त्यांचे नाव मृतांमध्येही नाही, ते जखमींमध्येही नाहीत, असे सांगितले. सरकार, प्रशासकीय अधिकारी यांच्याकडून कोणतीही माहिती आणि मदत मिळत नसल्याचे त्यांनी रिपोर्टरला सांगितले. अनेकांनी आपली व्यथा आणि नातेवाईकांच्या शोधाबाबत सांगताना आक्रोश केला. त्यामुळे बेपत्ता झालेल्यांच्या नातेवाईकांची फरफट सुरू असल्याचे दिसून येत आहे.