जिल्हाधिकारी सौरभ कटियार यांनी घेतला निवडणूक कामाचा आढावा:मतदान केंद्रांना दिल्या भेटी; नागरिकांना मतदान करण्याचे आवाहन

जिल्हाधिकारी सौरभ कटियार यांनी शुक्रवारी १५ नोव्हेंबरला चांदूरबाजार-अचलपूर विधानसभा मतदारसंघातील काही मतदान केंद्रांना प्रत्यक्ष भेटी देत निवडणूक कामकाजाची पाहणी करुन विविध पथकांचा आढावा घेतला. त्यांनी चांदूर शहरातील मतदान केंद्रांचीही पाहणी केली. सोबतच नागरीकांनी मोठया संख्येने मतदान करण्याचे आवाहन केले. एक दिवसाआधी जिल्हाधिकारी यांनी परतवाडा शहरातील आय.ई.एस गर्ल्स हायस्कूल आणि भगवंतराव शिवाजी पाटील महाविद्यालयासह इतर मतदान केंद्राना भेट देवून तेथील सोयी-सुविधांची पाहणी केली होती. तर केंद्राध्यक्ष व मतदान अधिकारी यांच्या प्रशिक्षणाच्या दुस-या दिवशी त्यांनी धारणी रोडवरील अंबिका लॉन्स येथे उपस्थित राहून निवडणूक प्रकिया पुर्णत: बिनचूकपणे पार पाडण्यासाठी विविध नमूने कसे भरावयाचे, वेळेचे बंधन कसे पाळायचे हे समजावून सांगीतले होते. दरम्यान अंबिका लॉन्स येथे प्रशिक्षणस्थळी केलेली योग्य बैठक व्यवस्था व इतर बाबींसाठी जिल्हाधिकारी यांनी संबंधितांचे कौतुक केले. या व्यवस्थेमुळे केंद्राध्यक्षांसह मतदान अधिकारी यांचे चेहऱ्यावर कमालीचे समाधान दिसून येत होते. आढावा घेतेवेळी त्यांच्यासोबत उपविभागीय अधिकारी तथा निवडणूक निर्णय अधिकारी बळवंत अरखराव, अचलपूरचे तहसिलदार डॉ. संजय गरकल, चांदुर बाजारचे तहसिलदार रामदास शेळके, नायब तहसिलदार अक्षय मांडवे, मंडळ अधिकारी अमोल बोकडे, गजानन दाते, गजानन राऊत आदी कर्मचारी उपस्थित होते.