तुमसरमध्ये अॅक्सिस बँकेतून 5 कोटींचा अपहार:शाखा व्यवस्थापकासह 10 जणांना अटक; पैसे दुप्पट करण्याच्या आमिषाने केला गैरव्यवहार

भंडारा जिल्ह्यातील तुमसर येथे अॅक्सिस बँकेच्या शाखेतून ५ कोटी रुपयांचा अपहार करण्यात आल्याची धक्कादायक घटना उघडकीस आली आहे. या प्रकरणी बँकेच्या शाखा व्यवस्थापकासह १० जणांना पोलिसांनी अटक केली आहे. पैसे दुप्पट करून देण्याच्या आमिषाला बळी पडून शाखा व्यवस्थापकाने बँकेतून ५ कोटी रुपये काढले. ही रक्कम चार मोठ्या सुटकेसमध्ये भरून दोन वाहनांमधून तुमसरमधील राजकमल ड्रायक्लिनर्समध्ये नेण्यात आली होती. छत्तीसगड आणि गोंदिया येथील टोळीने ५ कोटींच्या बदल्यात ७ कोटी देण्याचे आमिष दाखवून शाखा व्यवस्थापकाला जाळ्यात ओढले होते. अटक करण्यात आलेल्या आरोपींमध्ये विनीत कक्कड (३८), चंद्रशेखर धाबु (५४), शुभम नागदेवे (३३), मिलिंद रामटेके (३०), सागर मुलतानी (३२), राजा खोब्रागडे (३२), शुभम रंगारी (३३), गौरीशंकर बावनकुळे (४०), विशाल ठाकरे (२९) आणि जगदीश काटकर (४८) यांचा समावेश आहे. खबऱ्याने दिलेल्या माहितीच्या आधारे पोलीस निरीक्षक नितीन चिंचोडकर यांच्या मार्गदर्शनाखाली भंडारा स्थानिक गुन्हे शाखेने राजकमल ड्रायक्लिनर्समध्ये छापा टाकला. आरोपींकडून ५ कोटी रुपयांची रोकड जप्त करण्यात आली आहे. आरोपी या रकमेचा वापर आरटीजीएसद्वारे काळा पैसा पांढरा करण्यासाठी करणार होते.