देवगिल प्रोडक्शनवर कोट्यवधींच्या फसवणुकीचा आरोप:'अहो विक्रमार्क' चित्रपटासाठी गुंतवणूक करणाऱ्या सहनिर्मात्याची तक्रार; पोलिसांत गुन्हा दाखल

पुण्यातील भारती विद्यापीठ पोलीस ठाण्यात प्रसिद्ध अभिनेते देव गिल यांच्या विरोधात गंभीर स्वरूपाची तक्रार दाखल करण्यात आली आहे. 'अहो विक्रमार्क' या मराठी चित्रपटाच्या निर्मितीसाठी गुंतवणूक केलेल्या सहनिर्मात्यांची कोट्यवधींची फसवणूक केल्याचा आरोप आहे. जागा खरेदी-विक्रीचे व्यवसायिक श्रीकृष्ण गोसावी यांनी या चित्रपटासाठी १ कोटी १७ लाख रुपयांची गुंतवणूक केली होती. त्याबदल्यात त्यांना नफ्यातील ३ टक्के हिस्सा देण्याचे मान्य करण्यात आले होते, जो नंतर ४ टक्क्यांपर्यंत वाढवण्यात आला. मात्र, चित्रपटाचे बजेट ३० कोटी रुपये असल्याचे सांगून प्रत्यक्षात केवळ ८ ते १० कोटी रुपये खर्च करण्यात आल्याचा आरोप श्री. गोसावी यांनी केला आहे. ३० ऑगस्ट २०२४ रोजी प्रदर्शित झालेल्या या चित्रपटाच्या आर्थिक व्यवहारांबद्दल माहिती मागितली असता देव गिल यांनी टाळाटाळ केल्याचे तक्रारीत नमूद करण्यात आले आहे. माजी पोलीस आयुक्त अमिताभ गुप्ता यांचे नाव वापरून अनेक निर्मात्यांची फसवणूक केल्याचाही आरोप करण्यात आला आहे. श्री. गोसावी यांच्या म्हणण्यानुसार, देव गिल यांनी त्यांना धमकीही दिली आहे. आर्थिक गुन्हे शाखा या प्रकरणाचा तपास करत असून, एकूण १७ सहनिर्मात्यांपैकी किती जणांची फसवणूक झाली याचा तपास सुरू आहे. चित्रपटाच्या नफ्याबद्दल कोणतीही माहिती न देता केलेल्या या आर्थिक फसवणुकीमुळे सहनिर्मात्यांमध्ये संताप व्यक्त होत आहे.