नागपुरात पावणे सहाशे झाडांची कत्तल प्रकरण:कत्तल करणाऱ्या 5 आरोपींना पोलिसांकडून अटक

नागपुरात दोन दिवसांपूर्वी जवळपास पावणे सहाशे झाडे कापण्यात आली. या प्रकरणी पोलिसांनी आरोपीला अटक केली आहे. आरोपी हा एका जाहिरात कंपनीचा मालक असल्याची माहिती समोर आली आहे. त्यांच्यासह 5 जणांना पोलिसांनी अटक केली आहे. मिळालेल्या माहितीनुसार आरोपी विश्वजीत वैरागडेने दुभाजकावरील विद्युत खांबावर जाहिरात लावण्याचे टेंडर भरले होते. ते आपल्यालाच मिळेल त्यात ही झाडे अडथळा होतील म्हणून त्याने काही कामगारांना हाताशी धरत झाडांची कत्तल केली. नेमके प्रकरण काय? नागपूरच्या रिंग रोड हिंगणा टी-पॉइंटपासून कळमनापर्यंत अनेक किलोमीटरपर्यंत हा रस्ता पसरला आहे. मात्र, या रिंग रोडवरील त्रिमूर्तीनगर ते छत्रपती चौक दरम्यान सुमारे चार किलोमीटरच्या अंतरावरील दुभाजकावर चार चार फुटांच्या अंतरावर लावण्यात आलेल्या शेकडो झाडं गेल्या चार वर्षात जोरदारपणे वाढले होते. दरम्यान त्यांची उंची 20 फुटांपर्यंत झाली होती. त्यामुळे जणू एक हिरवी भिंतच दुभाजकावर निर्माण झाली होती. मात्र अनेक फुटांच्या उंचीच्या या हिरवळीमुळे त्या ठिकाणी स्ट्रीट लाईटच्या पोलवर लावण्यात येणाऱ्या वैध आणि अवैध होर्डिंग तसेच इतर फलक दोन्ही बाजूने येणाऱ्या जाणाऱ्या वाहन चालकांना स्पष्टपणे दिसत नव्हते. आणि त्यामुळेच झाडांची अशी निर्दयीपणे कापणी करून त्यांची उंची चार फुटांपर्यंत मर्यादित करण्यात आली. सार्वजनिक बांधकाम विभाग ही झाडे कोणी तोडली याबाबत अनभिज्ञ होता. तर मनपाच्या उद्यान विभागानेही वृक्षतोडीस कोणतीही परवानगी दिलेली नव्हती. यानंतर सार्वजनिक बांधकाम विभागाने प्रतापनगर पोलिस ठाण्यात याबाबत तक्रार दाखल केली. सिमेंटीकरण ‘ग्रीन सिटी’साठी बनले ग्रहण- नाना पटोले एकेकाळी ग्रीन सिटी म्हणून ओळखले जाणारे नागपूर आता काँक्रीटच्या जंगलात रूपांतरित झाले असल्याचा आरोप काँग्रेसचे प्रदेशाध्यक्ष नाना पटोले यांनी केला. तर 2014 पासून शहरात मोठ्या प्रमाणात झाडे तोडली जात आहेत, ज्यामुळे नागपूरची हिरवळ नष्ट झाली आहे.हे सर्व भ्रष्ट प्रशासनामुळे घडले असून ता या परिस्थितीचा निषेध करण्यासाठी जनता आंदोलनाचा मार्ग स्वीकारत आहे, असा आरोप पटोले यांनी केला.