परमपूज्य शांतीगिरिजी महाराजांना जगदगुरु पदवी प्रदान:प्रयागराज येथील कुंभमेळ्यात जगदगुरु पदाचा पट्टा अभिषेक सोहळा

कठोर तपस्वी निष्काम कर्मयोगी जगदगुरु जनार्दन स्वामी महाराजांचे उत्तराधिकारी अनंत विभूषित समर्थ सदगुरु स्वामी शांतीगिरिजी महाराज यांना श्री शंभू पंचदशनाम जुना आखाड्यांच्या वतीने जगदगुरु पदवी प्रदान करण्यात आली.जगदगुरु पदाचा पट्टा अभिषेक सोहळा अनेक वरिष्ठ संतांच्या उपस्थितीत संपन्न झाला. श्री शंभू पंच दशनाम जुना आखाड्यांच्या सर्व गुरुमुर्तींच्या प्रेरणेने व अखिल भारतीय आखाडा परिषदेचे महामंत्री श्री महंत हरीगिरीजी महाराज यांच्या प्रमुख उपस्थितीत जुना आखाडा पिठाधीश्वर आचार्य महामंडलेश्वर स्वामी अवधेशानंदगिरीजी महाराज यांच्या शुभ हस्ते महाराष्ट्रातील संत परंपरेतील थोर संत कठोर तपस्वी निष्काम कर्मयोगी जगदगुरु जनार्दन स्वामी (मौनगिरीजी) महाराज यांचे उत्तराधिकारी अनंत विभूषित सदगुरु स्वामी शांतीगिरीजी महाराज यांचा जगदगुरु पदाचा लक्षवेधी पट्टा अभिषेक सोहळा प्रयागराज येथील कुंभमेळ्यात अनेक साधू संतांच्या उपस्थितीत मोठ्या उत्साहपूर्ण वातावरणात संपन्न झाला. या उपाधीचे वैशिष्ट्य म्हणजे शांतीगिरिजी महाराज हे महाराष्ट्रातील पहिले संत ज्यांना जुना आखाड्याने जगदगुरु या उपाधीने सन्मानित केले.आद्यगुरु शंकराचार्यांनी निर्मित केलेले अखड्या मध्ये श्री शंभू पंच दशनाम जुना आखाडा ज्यांना आपण नागा साधू म्हणतो. भारतीय संस्कृतीचे रक्षण व प्रचार प्रसार या उद्देशासाठी या आखाड्याची स्थापना आद्य शंकराचार्यांनी केलेली आहे. आखाड्याच्या दृष्टीने निष्काम कर्मयोगी जगदगुरु जनार्दन स्वामी मौनगिरीजी महाराज यांनी देशभरातील सर्व आखाड्यामध्ये त्यांच्या निष्काम कार्यामुळे विशेष स्थान मिळवले होते. त्यांचे उत्तराधिकारी म्हणून अनंत विभूषित स्वामी शांतिगिरीजी महाराज यांनी त्यांच्या कार्यकाळामध्ये जप,तप अनुष्ठान ,श्रमदान ,गोसेवा, गुरुकुल, श्रमदान या परंपरा परिश्रमपूर्वक, श्रद्धापूर्वक अविरतपणे पुढे नेत आहे. यासाठी देशातील प्रमुख ठिकाणी व महाराष्ट्रात जवळपास १०८ पेक्षा जास्त आश्रमाची निर्मिती प्राचीन भारतीय संस्कृतीच्या प्रचार प्रसारासाठी केली आहे. त्यांच्या या कार्याची विशेष दखल घेऊन शंभू पंच दशनाम जुना आखाड्याने जगदगुरु या पदवीने आज त्यांना सन्मानित केले आहे. महाराष्ट्रातील संत परंपरेचा हा मोठा गौरव असून महाराष्ट्रातील जय बाबाजी भक्त परिवारासह देश भरातील संत-महंत, सामाजिक, अध्यात्मिक क्षेत्रातील मान्यवरांकडून जगदगुरु शांतीगिरिजी महाराज यांचे अभिनंदन होत आहे.