प्रवासी महिलेची बस कंडक्टरला मारहाण:नांदगीरवाडीतील प्रकार, कन्नड ग्रामीण पोलिस ठाण्यात शासकीय कामात अडथळ्याचा गुन्हा

सुट्या पैशांवरून प्रवासी महिलेने बसच्या महिला कंडक्टरसोबत वाद घातल्याप्रकरणी अज्ञात प्रवासी महिलेविरोधात शासकीय कामात अडथळाप्रकरणी कन्नड ग्रामीण पोलिस ठाण्यात गुन्हा दाखल करण्यात आला आहे. शनिवारी (१६ नोव्हेंबर) सकाळी साडेसात वाजता वडाळी मार्गे कन्नड ते चिकलठाण बस (बीटी १४ -१५७५) काही प्रवासी घेऊन निघाली. आठ वाजता बस हिवरखेडा नांदगीरवाडी येथे थांबली असता एका प्रवासी महिलेने बस कंडक्टर (वाहक) शिल्पा अवसरमोल (३४, रा. सरस्वती कॉलनी, कन्नड) यांच्याशी सुट्या पैशांवरून वाद घालून दमबाजी करत शासकीय कामात अडथळा निर्माण केला. या वेळी ग्रामस्थ आणि बसचालक पद्माकर पंढरे यांनी मध्यस्थी केली. प्रवासी महिलेने १०० रुपयांची नोट दिली. प्रवास भाडे १५ रुपये होते. पहिलीच फेरी असल्याने सुटे नसल्याने वाद विकोपाला गेला असल्याचे प्रत्यक्षदर्शीनी सांगितले. याप्रकरणी बस वाहक शिल्पा अवसरमोल यांच्या तक्रारीवरून कन्नड ग्रामीण पोलिसांत गुन्हा दाखल करण्यात आला असून पोलिस निरीक्षक रामचंद्र पवार यांच्या मार्गदर्शनाखाली ग्रामीण पोलिस तपास करत आहेत.