बनावट जामीन रॅकेटचा पर्दाफाश:दोन वकिलांसह 11 जणांना अटक; पुणे पोलिसांकडून बनावट कागदपत्रे व रबरी शिक्के जप्त

पुणे पोलिसांनी कारागृहातील गुन्हेगारांना बनावट कागदपत्रांच्या आधारे जामीन मिळवून देणाऱ्या मोठ्या रॅकेटचा पर्दाफाश केला आहे. या प्रकरणी दोन वकील आणि इतर नऊ जणांना अटक करण्यात आली असून, त्यांच्याकडून बनावट कागदपत्रे आणि रबरी शिक्के जप्त करण्यात आले आहेत. वानवडी पोलिसांनी केलेल्या कारवाईत अॅड. अस्लम सय्यद (45) आणि अॅड. सुरेश जाधव (43) या दोन वकिलांसह संतोषकुमार तेलंग, संजय पडवळ, सुभाष कोद्रे, ज्ञानेश्वर शिंदे, सुजीत सपकाळ, गोपाळ कांगणे, जितेंद्र कल्गुंटकर आणि दर्शन शाह यांना अटक केली आहे. या टोळीची कार्यपद्धती अशी होती की, कारागृहातील गुन्हेगारांच्या नातेवाईकांशी संपर्क साधून त्यांच्याकडून आर्थिक व्यवहार केला जात असे. त्यानंतर बनावट जामीनदारांचे आधारकार्ड, रेशनकार्ड आणि 7/12 उतारे तयार करून त्यावर पुरवठा विभागाच्या उपायुक्तांचे खोटे रबरी शिक्के मारले जात. या बनावट कागदपत्रांच्या आधारे न्यायालयाची दिशाभूल करून गुन्हेगारांना जामीन मिळवून दिला जात असे. पोलिस उपायुक्त डॉ. राजकुमार शिंदे यांच्या मार्गदर्शनाखाली केलेल्या कारवाईत आरोपींकडून 95 संशयित रेशनकार्ड, 11 बनावट आधारकार्ड, 9 रबरी शिक्के, शिक्के बनवण्याचे मशीन, मोबाईल हँडसेट आणि दुचाकी जप्त करण्यात आली आहे. या प्रकरणातील मुख्य आरोपी फरहान उर्फ बबलु शेख फरार असून पोलीस त्याचा शोध घेत आहेत.